Талантливые педагоги — талантливые дети

Згадзіцеся, што не так часта даводзіцца бачыць, каб у адной канцэртнай праграме выступалі прафесійныя музыканты, іх юныя выхаванцы і дарослыя аматары сцэны — жывёлаводы, работнікі сацыяльнай сферы, пенсіянеры. А вось у аграгарадку Навасёлкі такія канцэрты не рэдкасць. 

Арганізуе і праводзіць іх таленавіты калектыў мясцовай школы мастацтваў — пераможца абласнога агляду-конкурсу на лепшую пастаноўку работы сельскіх устаноў культуры.

— Творчая садружнасць дзяцей і дарослых — наш  неацэнны набытак, — адзначыла дырэктар школы Алена Салавей. — Я вельмі ўдзячна тым вяскоўцам, якія з жаданнем раскрываюць свае таленты, ствараюць настрой лю­дзям. Гэты кірунак работы бу­дзем развіваць і далей.

Галоўны ж клопат педагогаў — вучні. Іх у Навасёлках і Старым Двары (там працуе філіял школы) — 55. Дзеці па выбары займаюцца ў двух аддзяленнях — фартэпіяна і народным. Пра высокі ўзровень іх падрыхтоўкі сведчыць удзел у конкурсах, аглядах. Вось і нядаўна два аркестры баянаў, якімі кіруюць Алена Салавей і Алена Залатуская, занялі адпаведна другое і трэцяе месцы ў   конкурсе аркестраў школ мастацтваў і музычных школ Віцебшчыны. Увогуле, юныя баяністы з Навасёлак і раней былі ў ліку лепшых у вобласці.

Педагогі не абмяжоўваюцца абавязковым навучаннем. Хлопчыкі і дзяўчынкі  ахвотна займаюцца ў дзіцячым хоры, ансамблях танца “Дзяцінства”, гітарыстаў і лыжкароў, сольнымі спевамі. Гэта жывыя, дзеючыя гурткі. Педагогі настолькі захапілі вучняў, што пераважная большасць  іх не толькі ўмее іграць, прычым на некалькіх інструментах, але і спяваць, танцаваць. Ды яшчэ як! Сёлетняй вясной уладальніцай Гран-пры раённага конкурсу  эстраднай песні “Пастаўскія зоркі” стала салістка Алена Мацур, трэцяе месца заняла Марыя Літвіно­віч. Не было роўных і іх дуэту, які ўзнагароджаны дыпломам першай ступені. Нядаўна годна ацэнена творчасць і харэаграфічнага калектыву. З граматай вярнулася з абласнога конкурсу маладых выканаўцаў імя Мікалая Пятрэнкі вучаніца Насця Зінчанка.

Такіх прыкладаў шмат. Сакрэту ніякага няма: у дзяцей таленавітыя, рознабакова падрыхтаваныя педагогі. Яны самі больш за дзесяць гадоў з поспехам выступаюць у народным ансамблі песні “Маладзіца”.

Выхаванцаў школы мастацтваў вызначае не толькі высокі ўзровень падрыхтоўкі, але і сцэнічная культура, прыгожыя, самабытныя касцюмы, якія дапаўняюць выступленні, робяць іх яркімі, запамінальнымі. І наўрад ці хто ведае, што ў ролі дызайнера і швачкі адначасова выступае дырэктар школы нястомная Алена Міхайлаўна Салавей. Яна і яе калегі ў пастаянным творчым пошуку. А гэта значыць, што нас чакаюць новыя цікавыя сустрэчы з творчасцю дзяцей і дарослых.

Тэкст і фота Пятра КУРЫЛОВІЧА.