Юные и талантливые

Уладальнікі дыпломаў абласнога этапа рэспубліканскай прадметнай алімпіяды Юлія Казаровец, Таццяна Машніч, Ганна Пракаковіч, Надзея Дзямідка, Андрэй Кавалёнак, Таццяна Харко, Максім Данілаў і Кацярына Дунец.

На ўрачыстым сходзе з нагоды 75-годдзя Віцебскай вобласці і падвядзення вынікаў работы народнагаспадарчага комплексу раёна за 2012 год разам з прадпрыемствамі, арганізацыямі і ўстановамі, перадаві­камі вытворчасці былі ўшанаваны і юныя таленты Пастаўшчыны. Гэта традыцыя нарадзілася некалькі гадоў назад і з’яўляецца своеасаблівым аглядам найвышэйшых дасягненняў школьнікаў у вучобе, культурным і спартыўным жыцці.

Тут ёсць чым ганарыцца. У мінулым навучальным годзе, напрыклад, за поспехі ў навучанні асобных прадметаў 47 вучняў школ узнагароджаны Пахвальнымі лістамі, 10 дыпломаў заваявана на абласным этапе рэспубліканскай прадметнай алімпіяды, што з’яўляецца адным з лепшых вынікаў сярод сельскіх раёнаў вобласці. Сёлета глыбокія веды прадэманстравалі Максім Данілаў, На­дзея Дзямідка, Кацярына Дунец, Юлія Казаровец, Андрэй Кавалёнак, Таццяна Машніч, Ганна Пракаповіч, Кацярына Сушко і Таццяна Харко з Лынтупскай СШ, СШ №1, раённай гімназіі, Гуцкай СШ, СШ №2 і Варапаеўскай СШ.

Год ад году расце колькасць моладзі, якая актыўна ўдзельнічае ў арганізацыі культурна-масавага адпачынку, адраджэнні нацыянальных і культурных традыцый. Яркай па­дзеяй для раёна стала перамога вучаніцы СШ№3 Юліі Жыдкай у рэспубліканскім музычным тэлепраекце канала СТВ  “Спяваючыя гарады”. Пяцікласніца дзіцячай школы мастацтваў імя А. Тызенгаўза па класе “цымбалы” Лізавета Глазава заваявала званне лаўрэата і дыплом першай ступені рэспубліканскага адкрытага конкурсу выканаўцаў на народных інструментах імя І. Жынові­ча і Гран-пры Міжнароднага фестывалю-конкурсу маладых выканаўцаў “Палаюча зірка” г. Кіеў (Україна).

За межамі раёна і вобласці вядомы дасягненні юных валейбалістаў, каратыстаў і футбалістаў. На раённым свяце іх прадстаўлялі выхаванцы   спартыўнай школы г. Паставы Арцём Бандарэнка і Аляксей Лабуць, якія сталі пераможцамі першынства вобласці па валейболе. Званне чэмпіёна вобласці па футболе ў складзе каманды “ПМЦ-Паставы” заваяваў Андрэй Чашун. А выхаванец раённага маладзёжнага ваенна-спартыўнага клуба “Азімут” Дзмітрый Карпунін з’яўляецца прызёрам першынства свету і Еўропы па каратэ-до.

З поспехамі ў вучобе, творчымі і спартыўнымі дасягненнямі юных намінантаў павіншаваў і ўручыў ім Падзякі старшыня раённага выканаўчага камітэта В. С. Гутараў.

Тэкст і фота Пятра КУРЫЛОВІЧА.