В этот дом приходит праздник (+фото)

12 лютага ў Лынтупскім аддзяленні кругласутачнага знахо­джання тэрытарыяльнага цэнтра сацыяльнага абслугоўвання насельніцтва было як ніколі весела: тут спраўлялі каталіцкія запусты. Гулянне атрымалася шырокім — з катаннем на санях, спальваннем чучала, песнямі, танцамі, шматлікімі конкурсамі і забавамі. Пастаяльцы аддзялення не толькі праводзілі зіму, але і ўспомнілі вясну свайго жыцця — маладосць.

“Білетаў не патрэбна — прад’явіце добры настрой,” — паставіла “ўмову” перад пачаткам свята загадчыца Лынтупскага аддзялення ТЦСАН Надзея Тадэвушаўна Гатоўская.

Нягледзячы на свой паважаны ўзрост, пастаяльцы ўспрынялі свята “на ўра”: з задавальненнем частаваліся румянымі сімваламі сонейка — блінамі, удзельнічалі ў конкурсах, спявалі песні і прыпеўкі. Музычнае суправаджэнне забяспечыла лынтупчанка Алена Валасевіч. Яна і Вячаслаў Мураўёў удзельнічаюць у правядзенні кожнага свята ў аддзяленні.

Ладзіць творчыя святы тут даўно стала традыцыяй. Арганізацыяй займаюцца работнікі аддзялення, і заўсёды робяць гэта творча і з густам.

—         Пастаяльцы вельмі любяць такія мерапрыемствы, — расказала Надзея Тадэвушаўна. — І мы шчыра ўдзячны ўсім, хто нам дапамагае ў іх падрыхтоўцы. А гэта прадпрымальнікі К. І. Цюкша, Т. А. Карымулаева, Ф. М. Савіч, К. С. Савіч, Т. В. Клімюк, Л. М. Міхайлава, сябры аддзялення Юрый і Наталля Фурс. Яны па ўласнай ініцыятыве аказваюць нам спонсарскую дапамогу. Колькі падарункаў і радасці атрымалі нашы пастаяльцы на навагоднія святы! Як прыемна, што ёсць яшчэ ў свеце месца дабрачыннасці і міласэрнасці.

Шмат слоў удзячнасці выказала загадчыца ксяндзу Паўлу Кнурэку, айцу Валерыю Пашкевічу, кіраўніцтву Лынтупскага спіртзавода і ААТ “Блакітныя азёры-агра”, якія заўсёды дапамагаюць словам і справай.

Наперадзе 8 Сакавіка, Вялікдзень… Пастаяльцы аддзялення ўпэўнены: святы абавязкова прыйдуць і ў іх дом.

Іна СНЯЖКОВА.

Фота Вячаслава Мураўёва.