Поставские интеллектуалы сделали шаг к новой вершине (+ фото)

13 студзеня Паставы зноў былі ў цэнтры інтэлектуальных спаборніцтваў: на базе СШ № 1 прайшоў ХХ сінхронны чэмпіянат Рэспублікі Беларусь па гульні “Што? Дзе? Калі?”. У ім прынялі ўдзел дваццаць тры каманды з Пастаў, Глыбокага і Міёр.

Мерапрыемства наведала ганаровая госця — член Беларускага элітарнага клуба “Што? Дзе? Калі?”, уладаль­ніца вялікай хрустальнай савы Марыя Араноўская. Яна даставіла з Мінска пакет з пытаннямі для гульні, якія, як заўсёды, агучыў трэнер пастаўскіх інтэлектуалаў Уладзімір Пушкар.

—         Мне заўсёды прыемна прыязджаць у ваш горад, — сказала Марыя. — Вельмі радуе, што турнір збірае столькі дзяцей, асаблі­ва малодшага ўзросту. Бачу, якое задавальненне яны атрымліваюць ад гульні, як у іх гараць вочы. Упэўнена, у гэтым заслуга Ула­дзіміра Кранітавіча, які шмат часу і сіл аддае развіццю інтэлектуальнага руху. Я адразу прыняла яго запрашэнне наведаць спаборніцтвы — мне падабаецца дарыць дзецям станоўчыя эмоцыі.

Іх ад зносін з зорнай госцяй было шмат. Асабліва ў ювеналаў (вучняў 6-9 класаў), якіх на сёлетнім “сінхроне” было як ніколі многа. Вынікі іх гульні асабліва парадавалі: каманда ювеналаў “ММ&М’s” заняла агульнае другое месца. “Sistem of corn” — трэцяе. Перамогу святкавала юніёрская каманда “Паў Экстрыма”. “Залатыя” і “сярэбраныя” дружыны зборныя: у іх склад уваходзяць вучні СШ №1, №4, гімназіі і раённага цэнтра дзяцей і моладзі. “Sistem of corn” — каманда дзяўчат СШ №1.

У той дзень у сінхронным чэмпіянаце Беларусі ўдзельнічала 380 каманд, якія адказалі на адны і тыя ж пытанні ў 17 гарадах. Якія вынікі пастаўчан на ўзроўні рэспублікі?

— Нядрэнныя, — адказаў трэнер інтэлектуалаў Уладзімір Пушкар. — Каманда “ММ&М’s” набрала найбольшую колькасць балаў у вобласці, стала пятай у рэспубліцы і гарантавала сабе месца ў чэмпіянаце Беларусі па гульні “Што? Дзе? Калі?” сярод ювеналаў. Нам вельмі ганарова ў ім удзельнічаць, як і прымаць сінхронны чэмпіянат. Выказваю шчырую ўдзячнасць адміністрацыі СШ №1 за дапамогу ў правядзенні турніру.

Крокі да заваявання новых інтэлектуальных вяршынь зроблены. Чакаем новых прыемных навін са “штаба” разумнікаў.

 Іна СНЯЖКОВА.

Фота аўтара.