Кто из Татьян-поставчанок самая-самая? (+ фото)

Ва ўсе часы Таццянін дзень (ён жа Дзень студэнта) адзначаўся з песнямі, танцамі, гульнямі. Ад традыцыі не адмовіліся і маладыя пастаўчане. 25 сту­дзеня яны сабраліся ў клубе прафтэхкаледжа, каб разам адпачыць і павеся­ліцца. А ў першую чаргу — высветліць, якая з Таццян-пастаўчанак самая смелая, разумная, таленавітая і знаходлівая.

Галоўнымі дзеючымі асобамі мерапрыемства сталі Таццяна Дзячэнка (вучаніца СШ №1), Таццяна Петух (СШ №4), Таццяна Касарэўская (СШ №2), Таццяна Чарэнко (навучэнка гімназіі), Таццяна Лашук і Таццяна Кузоўская (абедзве — з прафтэхкаледжа). Яны і пазмагаліся ў шматлікіх конкурсах за званне самай-самай. “Журылі” дзяўчат першы сакратар райкама БРСМ Іна Каралёва, выкладчыца, педагог-арганізатар прафтэхкаледжа Антаніна Кухальская, начальнік аддзела па справах непаўналетніх раённага аддзела ўнутраных спраў Вячаслаў Врублеўскі, а таксама аўтар матэрыялу.

Чым захапляюцца ўдзельніцы конкурсу? Пра што мараць? Адказы на гэтыя і іншыя пытанні гледачы даведаліся дзякуючы першаму конкурсу — візітоўцы. У ім было шмат вершаў і песень, танцаў і ігры на музычных інструментах — адным словам, творчасці. Журы было няпроста вылучыць найлепшых, таму ў абсалютнай большасці дзяўчатам яны выставілі выдатныя адзнакі.

Затое наступнае выпрабаванне прайшлі “на пяць” толькі адзінкі. Таццянам трэба было прадэманстраваць веданне правілаў этыкету, што часам і выклікала цяжкасці. І не таму, што ў дзяўчат праблемы з кемлівасцю, — пытанні былі не заўсёды лёгкімі.

Ад інтэлектуальных спаборніцтваў — зноў да творчых. На трэцім этапе канкурсанткі паказалі свае акцёрскія здольнасці — у вобразах Бабы-Ягі, генерала, настаўніцы, дзіця, харэографа і рыначнай гандляркі прачыталі аднолькавы тэкст.

У чацвёртым па ліку конкурсе дзяўчатам прапаноўвалася зноў уключыць на ўсю моц фантазію. Патрабаванне — з дапамогай групы падтрымкі стварыць скульптуру на зададзеную тэму. Тут была і дрэсіроўка сабакі, і футбольны матч, і адказ каля дошкі… Толькі экспромт!

Павесяліла і апошняе выпрабаванне — “Зорны вобраз”. Таццяны на некалькі хвілін пераўвасобіліся ў агульнавядомых любіміц эстрады: Надзею Кадышаву, Сафію Ратару, Верку Сярдзючку… Апладысментаў атрымалі не менш, чым сапраўдныя зоркі!

Кульмінацыяй мерапрыемства стала падвядзенне вынікаў. Найбольшую колькасць балаў за ўсе пяць конкурсаў атрымала навучэнка прафтэхкаледжа Таццяна Лашук (на фота — пад нумарам 3). Яна з першых хвілін вылучалася артыстызмам, упэўненасцю ў сваіх сілах, нязмушанымі паводзінамі на сцэне.

Усе ўдзельніцы былі ўзнагароджаны дыпломамі і сувенірамі. Але найлепшым падарункам у той дзень стаў добры настрой, які дзяўчаты падарылі сабе і гледачам.

Іна СНЯЖКОВА.

Фота аўтара.