Есть идея? Поделись!

ГА “БРСМ” запрашае юнакоў і дзяўчат ва ўзросце ад 14 да 31 года прыняць удзел у маштабным рэспубліканскім праекце “100 ідэй для Беларусі”. Арганізатары ўпэўнены: моладзі пад сілу вырашаць сацыяльна-эканамічныя пытанні свайго рэгіёна і краіны ў цэлым.

Праект рэалізуецца ў тры этапы. Першы, адборачны, праводзіцца пастаянна. Ахвотныя павінны накіраваць заяўкі для ўдзелу ў рэгіянальны савет (у Паставах ім кіруе намеснік старшыні райвыканкама Юрый Мікалаевіч Кісялёў). Намінацыі для творчых работ наступныя: “Грамадзянска-патрыятычнае выхаванне моладзі”, “Эканамічныя ініцыятывы”, ­“Сям’я — аснова сучаснага грамадства”, “Фарміраванне здаровага ладу жыцця”, “Экалогія і энергазберажэнне”.

— Праект — выдатная магчымасць рэалізаваць свае ідэі і прынесці карысць нашаму рэгіёну, — адзначыла першы сакратар райкама “БРСМ” Іна Каралёва. — Свае распрацоўкі можна пакінуць у спецыяльных скрынях, якія будуць усталяваны ва ўсіх установах адукацыі, арганізацыях, дзе ёсць нашы “пярвічкі”. Пакінуць заяўку можна і па тэлефоне 4-21-36.

Пасля разгляду ў раёне праекты накіруюць на абласную экспертызу.  Галоўныя крытэрыі адбору — сацыяльная значнасць, актуальнасць узнятай праблемы і інавацыйны падыход да яе вырашэння.

Па выніках другога этапа маладзёжныя праекты адправяцца ў Мінск, дзе іх разгледзіць рэспубліканскі экспертны савет. Работы, якія атрымаюць станоўчыя рэкамендацыі, будуць размешчаны на Інтэрнэт-партале “Моладзь Беларусі” (www.brsm.by) і ў тэматычнай групе ў сацыяльнай інтэрнэт-сетцы “Вконтакте”.  Арганізатары абяцаюць стварэнне маладзёжнага інтэрнэт-форуму для абмеркавання кожнай ідэі.

Найлепшыя праекты будуць вызначаны па выніках галасавання з улікам меркаванняў экспертаў, якія збяруцца на выніковым пасяджэнні рэспубліканскага савета. Аўтары самых цікавых работ атрымаюць сертыфікаты ГА “БРСМ”, запрашэнне на штогадовую рэспубліканскую маладзёжную выставу “100 ідэй для Беларусі” і, галоўнае, — «зялёнае святло» і фінансавую падтрымку для рэалізацыі ўласнага праекта.

Іна СНЯЖКОВА.