У “акаймоўцы” саксафона і скрыпкі. У раёне прайшоў музычны фестываль “Гучаць старадаўнія арганы Пастаўшчыны”

Кацярына Архіпава, Віктар Кісцень, Тамара Рэмез і Канстанцін Шараў.

24—25 кастрычніка ў нашым раёне прайшоў трэці музычны фестываль “Гучаць старадаўнія арганы Пастаўшчыны”, які арганізуюць Пастаўскі райвыканкам сумесна з Беларускай дзяржаўнай акадэміяй музыкі і парафіяй касцёла Святога Антонія Падуанскага ў райцэнтры. Ён падарыў усім аматарам духоўнага музычнага мастацтва сустрэчу з ужо вядомымі і новымі на Пастаўшчыне выканаўцамі.

Менавіта старыя добрыя госці пастаўскай зямлі — выкладчыца Беларускай дзяржаўнай акадэміі музыкі, таленавітая арганістка Вольга Падгайская і лаўрэат міжнародных конкурсаў, саксафаніст Віталій Дарашук — адкрылі ў суботу фестывальную праграму ў Паставах, парадаваўшы ўсіх, хто прыйшоў у касцёл Святога Антонія Падуанскага, цудоўным канцэртам. На працягу га­дзіны ў іх выкананні гучалі творы кампазітараў арганнай музыкі розных часоў — ад XІV стагоддзя да нашых дзён. В. Падгайская выканала і адзін твор уласнага сачынення — “Калыханку”. Зата­іў­шы дыханне, слухалі прысутныя чароўныя гукі, якія запаўнялі сабой усю прастору храма, адбіваліся рэхам ад яго скляпенняў і набывалі асаблівую глыбіню.

Вядучая канцэрта Маргарыта Захарыя.

За арганам Вольга Падгайская.

У нядзелю прычыніцца да высокага мастацтва мелі магчымасць таксама жыхары раёна. Раніцай адбыліся канцэрты ў касцёлах Святога Іаана Хрысціцеля ў Камаях і Святога Тадэвуша ў Лучаі. А днём арган зноў загучаў у Паставах. У гэты дзень перад слухачамі выступілі арганіст мінскага касцёла Найсвяцейшай Тройцы, журналіст Беларускага радыё Віктар Кісцень, салістка ансамбля “Камерныя салісты Мінска”, скрыпачка Кацярына Архіпава і салісты Бел­дзярж­філармоніі Канстанцін Шараў (арган) і  Тамара Рэмез (вакал). Вяла канцэрты дыктар Беларускага радыё Маргарыта Захарыя.

І зноў, як і ў першы фестывальны дзень, паслухаць жывую музыку ў выкананні прызнаных майстроў, якія з’яўляюцца лаўрэатамі рэспубліканскіх і міжнародных конкурсаў і фестываляў, прыйшлі сотні пастаўчан і жыхароў раёна. Дружнымі апладысментамі яны дзякавалі музыкантам за кожны твор. Але асабліва шчыра і доўга апладзіравалі салістцы Тамары Рэмез, чый непаўторны голас заварожваў сваёй чысцінёй і сярэбранымі пералівамі.

— Прыблізна ў адзін час у Беларусі праходзяць адразу тры фестывалі духоўнай музыкі: “Званы Сафіі” ў Полацку, “Залатагорская ліра” ў Мінску і “Гучаць старадаўнія арганы Пастаўшчыны”, — адзначыў пасля заканчэння канцэрта ў Паставах аўтар ідэі правядзення музычнага свята, эксперт-каардынатар нацыянальных і міжнародных культурных праектаў Беларускага фонду культуры Т. І. Стружэцкі. — І гэты фестываль наўрад ці адбыўся б, калі б у вашым горадзе не было такога ўзнёслага, прыгожага душой і сэрцам чалавека, як ксёндз-пробашч Анджэй Возьняк. Спачатку ён прадаставіў касцёл для канцэртаў у рамках Міжнароднага фестывалю “Звіняць цымбалы і гармонік”. А зараз у яго сценах вы маеце яшчэ адну магчымасць слухаць цудоўную арганную музыку.

Шчырыя словы ўдзячнасці Тадэвуш Іванавіч адрасаваў таксама кіраўніцтву райвыканкама і аддзелу ідэалагічнай работы, культуры і па справах моладзі, якія зрабілі ўсё, каб музычны форум праходзіў на належным узроўні. Пры гэтым выказаў надзею, што фестываль на Пастаўшчыне павінен існаваць многія гады, бо тут захаваліся чатыры цудоўныя арганы. У той час як далёка не ў кожным куточку Беларусі зной­дзецца хаця б адзін аўтэнтычны інструмент у добрым стане, на якім могуць іграць музыканты самага высокага ўзроўню.

— Упэўнены, калі фестываль будзе жыць, ён прыцягне новых выканаўцаў і сюды абавязкова прыедуць арганісты з іншых краін. Хацелася б, каб яго лёс быў такім жа доўгім, як і “цымбалаў”, і вы маглі прыходзіць на канцэрты сем’ямі, з роднымі і сябрамі, — рэзюмаваў Т. І. Стружэцкі.

Начальнік аддзела ідэалагічнай работы, культуры і па справах моладзі райвыканкама Г. М. Чаплінская ў сваю чаргу заўважыла, што музыка, якая гучыць у намоленых стагоддзямі храмах, — асаблівая. Яна ўзбагачае нас духоўна, вучыць любіць жыццё і Бога, вядзе да веры.  Ад імя ўсіх пастаўчан Галіна Мікалаеўна падзякавала Тадэвушу Іванавічу, які дапамагае арганізоўваць фестывалі, і музыкантам за цудоўны падарунак — чароўную музыку і магчымасць далучыцца да высокага выканальніцкага майстэрства. А затым уручыла гасцям і ксяндзу-пробашчу Анджэю Возь­няку Падзячныя лісты райвыканкама і невялікія падарункі.

Алена ШАПАВАЛАВА. Фота аўтара.