Дзякуй, “Сафія”!

15 кастрычніка новае аддзяленне дзённага знаходжання для пажылых грамадзян Пастаўскага ТЦСАН наведалі прадстаўнікі міжнароднага дабрачыннага грамадскага аб’яднання “Сафія”. Дзякуючы яго фінансавай дапамозе тут цалкам абсталявана трэнажорная зала. Сума праекта склала больш за 15 мільёнаў рублёў.

Дабрачыннае аб’яднанне супрацоўнічае з Пастаўскім тэрытарыяльным цэнтрам сацыяльнага абслугоўвання насельніцтва не  ўпершыню. Раней за яго кошт было набыта абсталяванне для кухні ў Дунілавіцкі псіханеўралагічны дом-інтэрнат, для пральні — у Лынтупскае аддзяленне кругласутачнага знаходжання.

У Беларусі “Сафія” ажыццяўляе сваю дзейнасць з 1999 года. За гэты час рэалізаваны сотні праектаў — як у Мінску, абласных цэнтрах, так і ў шматлікіх рэгіёнах. Яны скіраваны на аказанне дапамогі пажылым, маламаёмным грамадзянам, інвалідам і іншым уразлівым катэгорыям насельніцтва.

У Паставы прыехала дэлегацыя ў скла­дзе сямі чалавек. Сярод іх былі кіраўнікі гуманітарнай работы ў Беларусі Гэры і Кейлін Джон, чатыры юнакі-валанцёры з Амерыкі і выканаўчы дырэктар МДГА “Сафія” Сяргей Зубовіч. Мэта візіту — убачыць вынік сумеснай працы.

Гасцей сустракалі начальнік упраўлення па працы, занятасці і сацыяльнай абароне райвыканкама Пётр Леанідавіч Курто і дырэктар ТЦСАН Дзіяна Іванаўна Пякарская. Разам з загадчыцай аддзялення дзённага знаходжання для пажылых грамадзян Ларысай Фень яны правялі экскурсію па пакоях нядаўна адкрытай установы, расказалі пра асноўныя кірункі яе дзейнасці.

Кабінет для масажу і ароматэрапіі, камп’­ютарны клас і нават гасцінічны нумар — тут шмат што звяртае на сябе ўвагу. Але найбольш дэлегацыю цікавіла трэнажорная зала. Яна атрымалася прасторнай і сучасна абсталяванай. Дзякуючы “Сафіі” закуплены новыя вібрамасажор, магнітны велатрэнажор, магнітны эліптычны трэнажор, лаўка для прэса, дыванкі для аэробікі, стэп-платформы, абручы… Госці праверылі іх работу і кожны пазначылі спецыяльным лагатыпам.

—            Мы прыемна ўражаны, — пракаменціраваў Гэры Джон. —  Найперш таму, што бачылі, як выглядала гэта памяшканне да рамонту і ў яго працэсе. Адчуваецца, колькі сіл укладзена ў будаўніцтва аддзялення. Упэўнены, што яно будзе запатрабаваным у пажылых людзей, паспрыяе ўмацаванню іх здароўя. Праект закрыты, але планаў у нас, як заўсёды, шмат. Мы таксама аказваем дапамогу ўстановам аховы здароўя (напрыклад, у Віцебску рэалізуецца маштабная міжнародная праграма-трэнінг “Пярвічная рэанімацыя нованароджаных”), прапагандуем здаровы лад жыцця, сямейныя каштоўнасці. Напрыклад, у нас з жонкай сямёра дзяцей, амаль чатыры дзясяткі ўнукаў. У Патрыка, нашага валанцёра, трынаццаць братоў і сясцёр. Мы ўсе перакананы, што моцная дзяржава пачынаецца з моцнай сям’і.

Візіт дэлегацыі быў непрацяглым — яе ў той дзень чакалі на закрыцці яшчэ некалькіх праектаў у розных раёнах Віцебшчыны.

—            Мы былі рады сустракаць у нашым аддзяленні такіх ганаровых гасцей, — адзначыла Д. І. Пякарская. — Тэрытарыяльны цэнтр сацыяльнага абслугоўвання шчыра ўдзячны “Сафіі” за такую важкую дапамогу. Спадзяёмся, што сумесныя праекты будуць працягвацца.

Іна СНЯЖКОВА. Фота аўтара.