Важна наяўнасць альтэрнатывы

У выбарах адным з важнейшых момантаў з’яўляецца наяўнасць альтэрнатывы. Такое меркаванне выказала старшыня ЦВК Беларусі Лідзія Ярмошына.

Яна 29 ліпеня праводзіла семінар-нараду са старшынямі, намеснікамі і сакратарамі тэрытарыяльных камісій па выбарах Прэзідэнта Беларусі, прадстаўнікамі мясцовых выканаўчых і распарадчых органаў, СМІ Магілёўскай вобласці.

“Для ініцыятыўных груп, зарэгістраваных у краіне, створаны аднолькавыя ўмовы, іх рабоце садзейнічаюць мясцовыя ўлады і выбарчыя камісіі, — падкрэсліла Лідзія Ярмошына. — Перад намі не стаіць задача нейкім чынам зменшыць колькасць патэнцыяльных кандыдатаў на пасаду Прэзідэнта Беларусі. Наадварот, мы імкнёмся да таго, каб нашы выбары былі альтэрнатыўнымі”.

У гэтай прэзідэнцкай кампаніі акцэнт будзе зроблены на ўзмацненні прынцыпу галоснасці ў рабоце выбарчых камісій, падкрэсліла на мерапрыемстве Лідзія Ярмошына. Сайты выканкамаў, мясцовых адміністрацый павінны аператыўна размяшчаць інфармацыю аб дзейнасці тэрытарыяльных камісій. У сувязі з гэтым ідэалагічныя і аргаддзелы выканкамаў павінны працаваць у цеснай узаемасувязі, аператыўна і ў абавязковым парадку публікаваць усе матэрыялы, якія датычацца выбараў.

БелТА.

Урны для галасавання — толькі празрыстыя

Празрыстыя ўрны будуць устаноўлены на ўсіх участках для галасавання ў Віцебскай вобласці. Пра гэта паведаміў журналістам сакратар Цэнтральнай камісіі па выбарах і правядзенні рэспубліканскіх рэферэндумаў Мікалай Лазавік, які 29 ліпеня правёў у Віцебску семінар-вучобу з кіруючым складам тэрытарыяльных выбарчых камісій рэгіёна.

Мікалай Лазавік адзначыў, што Віцебская вобласць традыцыйна з’яўляецца генератарам прагрэсіўных ідэй у розных галінах, у тым ліку ў арганізацыі і правядзенні выбараў. “Вобласць паставіла перад сабой задачу, каб на ўсіх выбарчых участках былі празрыстыя ўрны. Цэнтральная камісія такую задачу не ставіць, але мы павінны сказаць дзякуй усім, хто гэта зробіць. Няхай будуць празрыстыя ўрны, магчыма, у нашых апанентаў, якія крытыкуюць арганізацыю выбараў, будзе менш прэтэнзій. Хоць, па вялікім рахунку, я глыбока перакананы, што празрыстасць выбараў і празрыстасць урны — гэта не сінонімы”, — сказаў сакратар ЦВК.

У Віцебскай вобласці ўтвораны 26 тэрытарыяльных выбарчых камісій па выбарах Прэзідэнта Рэспублікі Беларусь. Акрамя абласной, гэта 21 раённая, адна гарадская ў Наваполацку і тры раённыя ў Віцебску.

З інтэрнэт-крыніц.