Запісацца на прыём да ўрача можна і праз інтэрнэт

З нядаўняга часу для таго, каб трапіць на прыём да ўрача Пастаўскай паліклінікі, гараджанам і жыхарам раёна зусім неабавязкова звяртацца па талон у рэгістратуру. Заказаць яго можна праз інтэрнэт. Гэта стала магчымым дзякуючы падключэнню паліклінікі да спецыяльнага інтэрнэт-сэрвісу “Таlоn.by”.

Па словах галоўнага ўрача УАЗ “Пастаўская ЦРБ” У. М. Чакавага, Паставы сталі адным з чатырох раённых цэнтраў Віцебшчыны (тры іншыя — Полацк, Браслаў і Талачын), дзе ў рамках інфарматызацыі сістэмы аховы здароўя Беларусі пачаўся паэтапны пераход да электронных медыцынскіх дакументаў. Да сэрвісу “Таlоn.by” установа падключылася крыху больш за тыдзень назад. Зараз ідзе апрабацыя новай паслугі, якая хутка набірае папулярнасць сярод насельніцтва: ужо сёння пастаўчане штодзень заказваюць па 10-15 талонаў праз сусветнае павуцінне. Зрабіць гэта прасцей простага і можна ў любы час сутак, у любым месцы, дзе ёсць інтэрнэт: дома, на рабоце, у дарозе, з дапамогай камп’ютара або мабільнага тэлефона. Зайшоўшы на старонку ЦРБ, наведвальнікі могуць атрымаць даведачную інфармацыю пра медустанову, азнаёміцца з раскладам работы ўрачоў паліклінікі, выбраць і заказаць талон на зручны для сябе час. Заказаныя талоны можна праглядваць, адмяняць або раздрукоў­ваць непасрэдна з сайта.

На сённяшні дзень заказ талонаў праз інтэрнэт ажыццяўляецца да наступных спецыялістаў: урача агульнай практыкі, гінеколага, кардыёлага, афтальмолага, анколага, оталарынголага, тэрапеўта, хірурга і эндакрынолага. У будучым кіраўніцтва паліклінікі збіраецца арганізаваць такім чынам іх выдачу для праходжання прафаглядаў і вадзіцельскай камісіі, а працэнт рэалізацыі з дапамогай электронных сродкаў давесці да 20.

Алена ШАПАВАЛАВА.