З завяршэннем уборкі, 10-тысячным намалотам!

Дажынкамі ў полі завяршылася сёлетняе жніво ў адкрытым акцыянерным таварыстве “Навасёлкі-Лучай”. На апошніх гектарах яго правялі экіпажы камбайнаў на чале з Сяргеем Каралёнкам, Уладзімірам Пралічам, Сяргеем Гілём і іншымі перадавікамі. Ганаровым госцем хлебаробаў быў старшыня раённага выканаўчага камітэта Віктар Сяргеевіч Гутараў.

Дырэктару адкрытага акцыянернага таварыства “Навасёлкі-Лучай” Юрыю Францішкавічу Шымчыку, 

галоўнаму аграному Веры Васільеўне Мукель,    галоўнаму інжынеру Яўгенію Янісавічу Вішнеўскаму, 

   старшыні  прафкамітэта Славаміру Генрыхавічу Шапелю, камбайнерам, іх памочнікам, вадзіцелям,

 аператарам зернесушыльных комплексаў, усім хлебаробам

Сардэчна віншую з завяршэннем уборкі зерневых і зернебабовых, намалотам 10000 тон зерня новага ўра­джаю. Правёўшы ў сціслыя тэрміны сёлетняе жніво, вы атрымалі вышэйшыя за мінулагоднія ўраджайнасць і валавы намалот, перавыканалі дзяржаўны заказ — рэалізавалі больш за 1400 тон харчовага збожжа.

Дасягнутыя паказчыкі на хлебнай ніве з’яўляюцца вынікам умелага гаспадарання на зямлі, укаранення новых тэхналогій, захавання аптымальных тэрмінаў сяўбы, догляду пасеваў. Асаблівую арганізаванасць і зладжанасць хлебаробы прадэманстравалі на заключным этапе — уборцы. Ваша гаспадарка з’яўляецца адзінай на Пастаўшчыне, дзе шэсць экіпажаў камбайнаў намалацілі і чатыры вадзіцелі перавезлі па тысячы і больш тон зерня кожны. Бесперабойна працавалі сушыльная гаспадарка, іншыя звенні ўборачнага канвеера.

Перакананы, што ў сельгаспрадпрыемстве якасна і ў лепшыя тэрміны будзе праведзена сяўба азімага рапсу і зерневых культур, убрана кукуруза, надзейна пастаўлена на захоўванне ўборачная і іншая тэхніка.

Вялікі вам дзякуй за багаты хлебны каравай, працу і нястомнасць! Жадаю далейшых поспехаў, моцнага здароўя, шчасця і дабрабыту!

В. ГУТАРАЎ, старшыня раённага  выканаўчага камітэта.