Ушанавалі сваіх ветэранаў

І. І. Януковіч віншуе І. М. Вараб’ёва.

У адзін з красавіцкіх дзён пастаўскія ратавальнікі наведалі іх па месцы жыхарства, каб уручыць віншавальныя паштоўкі, пажадаць моцнага зда­роўя і падзякаваць за працу ў раённым аддзеле па надзвычайных сітуацыях. Нагодай для гэтага стаў аб’яўлены два гады назад загадам мі­ністра па надзвычайных сітуацыях Рэспублікі Беларусь Дзень ушанавання ветэранаў органаў і падраздзяленняў МНС.

Раней, у савецкія часы, 17 красавіка было пазначана ў календары як Дзень пажарнай службы. Але пасля праведзенай у сярэдзіне 90-ых гадоў мінулага стагоддзя ваенізацыі пажарных часцей, а затым іх уваходжання ў склад Міністэрства па надзвычайных сітуацыях у беларускіх пажарных-ратавальнікаў з’явілі­ся іншыя прафесійныя святы. Тым не менш пра названую вышэй дату яны таксама не забывалі, зрабіўшы ўрэшце яе днём былых агняборцаў.

У Пастаўскім РАНС такіх на сённяшні дзень 32 чалавекі, у тым ліку чацвёра ветэранаў пажарнай службы. 17 красавіка ўсе яны атрымалі персанальныя віншаванні ад намесніка начальніка аддзела па ідэалагічнай рабоце і кадравым забеспячэнні І. І. Януковіча і начальніка Варапаеўскага паста Я. К. Зубовіча. Сярод тых, да каго завіталі дамоў, быў і Іван Міхайлавіч Вараб’ёў, які каля 20 гадоў адпрацаваў вадзіцелем у пажарнай часці ў Паставах. 79-гадовы пенсіянер у свой час нямала зрабіў для яе станаўлення і развіцця, удзельнічаў у ліквідацыі складаных надзвычайных сітуацый, у тым ліку вядомага пажару нафтабазы ў Круляўшчызне, дзе гарэла больш за 5 тысяч тон паліва. У 1994 годзе выйшаў на пенсію, але сувязі з аддзелам не парывае і сёння. Паколькі жыве ў службовай кватэры ў будынку пажарнага дэпо, амаль што­дзень заглядвае на былое месца працы, з радасцю адклікаецца на запрашэнне кіраўніцтва РАНС выступіць перад маладымі ратавальнікамі. У сваю чаргу тыя выконваюць усе просьбы ветэрана: дапамагчы нешта занесці ў дом, падрамантаваць аўтамабіль і г.д.

Увогуле, па словах І. І. Януковіча, па дапамогу ў аддзел пенсіянеры звяртаюцца нячаста. Але калі гэта адбываецца, тут нікому ні ў чым не адмаўляюць: датычыць гэта рамонту агароджы ці павеці, перакрыцця даху або арганізацыі пахавання. Кожнае прафесійнае свята ветэраны МНС практычна ў поўным скла­дзе прысутнічаюць на ўрачыстасцях у РАНС (тых, хто не можа дабрацца самастойна, прывозяць і адвозяць на службовым транспарце). Яны ганаровыя госці і на ўручэнні пагонаў цяперашнім работнікам. Асабліва актыўны ўдзел ва ўсіх мерапрыемствах прымаюць члены ветэранскай арганізацыі “Ратавальнік”, якую ўзначальвае М. Ф. Брэскі.

Алена ШАПАВАЛАВА.

Фота аўтара.