Цэнтру турысцкіх паслуг — 10 гадоў

Ягор Шушкевіч

1 красавіка 2014 года свой юбілей адзначыла ТДА “Цэнтр турысцкіх паслуг”, якім кіруе  Ягор Шушкевіч. Роўна 10 гадоў  таму гэта ўстанова пачала працаваць  ў Паставах. У 2006-ым адкрыўся яе філіял у Наваполацку. За гады існавання фірма дабілася прызнання на нацыянальным і нават міжнародным узроўнях. Некалькі разоў цэнтр станавіўся лаўрэатам і дыпламантам рэспубліканскага конкурсу “Пазнай Беларусь”, двойчы — “Лепшы прадпрымальнік Віцебскай вобласці”, у 2009-ым — лаўрэатам рэспубліканскага конкурсу “Лепшы прадпрымальнік у галіне турызму“, а ўсіх ганаровых грамат і дыпломаў нават не злічыць.

Асноўным напрамкам дзейнасці фірмы заўсёды з’яўлялася арганізацыя ўязнога турызму. Як адзначае Ягор Часлававіч: “Вельмі хацелася прадставіць родную Пастаўшчыну ў самым лепшым выглядзе, прыцягнуць сюды як мага больш гасцей. Край наш мае багатае гістарычнае мінулае. А пра яго маляўнічую прыгажосць нават песні ды казкі складаць варта”. У выні­ку ўзнік экскурсійны маршрут “Край азёр, касцёлаў, паркаў”. Але чагосці не хапала апантанай натуры Шушкевіча. Хацелася менавіта самай сапраўднай казкі. І яна з’явілася, калі з лёгкай рукі супрацоўнікаў фірмы пасяліўся ў мясцовых лясах белабароды дзядуля Зюзя. Гэта адбылося ў 2005 го­дзе. З вялікай павагай і ўдзячнасцю гаворыць Ягор Часлававіч пра тагачаснае кіраўніцтва раёна: “У тым, што наш Зюзя пася­ліўся на Пастаўшчыне, найвялікшая заслуга былога старшыні Пастаўскага райвыканкама Эдуарда Пятровіча Казуры і яго намесніка Алы Эдмундаўны Кейзік, якія былі захоплены ідэяй стварэння сапраўднага турыстычнага комплексу».

За час існавання ся­дзібы Зюзю Паазерскага наведалі больш за 40 тысяч турыстаў з Беларусі, Расіі і самых розных краін свету. Усіх тут сустракалі так, як спакон вякоў вядзецца на Беларусі: гасцінна, весела і шчодра.

Напрыканцы 2013 года Зюзя ўпершыню выехаў за межы сваёй сядзібы і пачаў падарожнічаць па Беларусі. Самымі яскравымі паездкамі былі неаднаразовыя ваяжы ў Бярэзінскі бія­сферны запаведнік і Белавежскую пушчу. Асаблівае ўражанне пакінуў юбілей беларускага Дзеда Мароза ў Белавежжы. Зюзя і яго світа (а гэта Завея, Карачун і баба Напасця) знайшлі там шмат новых сяброў, ды нават зімовых родзічаў Зюзі. Гэта Дзед Мароз з Вялікага Усцюга, Сусветны казачы Дзед Мароз з Гатчыны Ленінградскай вобласці, Паккайне з Карэліі, Кыш Бабай з Татарстана, наш бярэзінскі зямляк Балотнік і шмат іншых цікавых персанажаў. Свята працягвалася тры дні. Шматлікія фотасесіі, прэс-канферэнцыі, інтэрв’ю паказалі, што наш Зюзя карыстаецца папулярнасцю як у звычайных турыстаў, так і ў прадстаўнікоў прэсы. Галоўнымі момантамі феерыі сталі адкрыццё “Чароўнай вярсты” і “Казачнай карты” Расіі і Беларусі. У Расіі 16 афіцыйных кропак пражывання казачных персанажаў, у Беларусі — чатыры (пад нумарам 2 — Зюзя Паазерскі, в. Азяркі Віцебскай вобласці). Адзначу таксама вялікую цікавасць да Зюзі з расійскага боку. Кіраўнік праекта “Казачная карта” Аляксей Казлоўскі так і сказаў на развітанне: “Забяру я хутка вашага Зюзю ў Маскву”. Пытаюся ў Ягора: “Ну як, ці пае­дзеш?” Ён у адказ усміхаецца: “А чаму б і не! Мы ж турысты-авантурысты!” А потым ужо сур’ёзна дадае: — “У госці — з задавальненнем, а вось на пастаяннае месца жыхарства не згодзен! Усё ж такі Зюзя — персанаж беларускага фальклору і размаўляе ён выключна на беларускай мове. Менавіта ў гэтым яго асаблівы каларыт і прыцягальнасць для турыстаў. Менавіта тут ён сапраўдны, родны, тутэйшы”.

Акрамя праекта “Зюзя Паазерскі”, фірма працуе і ў іншых напрамках. Вялікая ўвага надаецца выязному турызму. З Цэнтрам турысцкіх паслуг вы лёгка можаце накіравацца ў цікавыя экскурсіі па еўрапейскіх краінах і атрымаць асалоду ад пляжнага адпачынку на лепшых сусветных курортах. У гэтым годзе ўзніклі складанасці з крымскім напрамкам. Пакуль у якасці альтэрнатывы будзем прапаноўваць адпачынак у Паланзе, Юрмале, на расійскім узбярэжжы Чорнага мора. Максімальна поўную інфармацыю вы можаце атрымаць па тэлефонах: 4-27-77, 8(029) 712-27-77, 8(029) 732-27-77. Дадам, што былы будынак фірмы па вуліцы Набярэжнай закрыты на рэканструкцыю. Але ў хуткім часе расчыніць дзверы новы офіс па вуліцы Чырвонаармейскай, 4. Нашы кваліфікаваныя спецыялісты заўсёды сустрэнуць вас з радасцю”.

Наталія КАРНІЛАВА.