Пастаўскі ”Гарызонт” пашырыўся

Старшыня раённага выканаўчага камітэта Віктар Сяргеевіч Гутараў і дырэктар ПУВП “Завод “Беліт” Дзмітрый Барысавіч Чыжэўскі пераразаюць сімвалічную стужку на адкрыцці новай залы рынка “Гарызонт”.

У канцы лютага споўнілася дзесяць гадоў, як на невыкарыстоўваемых вытворчых плошчах ПВУП “Завод “Беліт” размясціўся гандлёвы рынак “Гарызонт”. Яго адкрыццё стала значнай падзеяй у жыцці прадаўцоў і пакупнікоў. Рынак запатрабаваны і сёння. Кіраўнік службы рознічнага гандлю і арэндных адносін прадпрыемства Яўгенія Шаўкапляс расказала, што для продажу харчовых і прамысловых тавараў цяпер устаноўлены 221 ралет, створана 160 рабочых месцаў. Сваю  дзейнасць на рынку ажыццяўляюць 9 магазінаў, 13 прыватных прадпрыемстваў і каля 140 прадпрымальнікаў. Атрымалася даволі разгалінаваная гандлёвая сетка, паслугамі якой карыстаюцца не толькі пастаўчане, але і жыхары суседніх  раёнаў.

У той жа час рост колькасці прадпрымальніцкіх структур, неабходнасць удасканалення работы па абслугоўванні пакупнікоў  прымусілі дырэкцыю завода, які з’яўляецца гаспадаром рынка, пайсці на пашырэнне яго межаў шляхам абсталявання гандлёвых месцаў у зале, суседняй з дзеючымі. Спатрэбілася нямногім больш за два месяцы, каб былая вытворчая плошча набыла прывабны выгляд. Пасля рамонту тут стварылі 56 рабочых месцаў, у асноўным для індывідуальных прадпрымальнікаў. Усяго ж было ўстаноўлена 87  ралетаў, частка якіх выкарыстана для абсталявання магазінаў. Тут жа маецца пункт па абмене валюты, будзе прасторнае кафэ з азербайджанскай кухняй.

Афіцыйнае адкрыццё новай залы рынка “Гарызонт” адбылося ў суботу, 12 красавіка. На ім прысутнічалі старшыня райвыканкама  В. С. Гутараў, дырэктар прадпрыемства “Завод “Беліт” Д. Б. Чыжэўскі, прадаўцы і пакупнікі. Пасля таго як была перарэзана сімвалічная чырвоная стужка, кіраўнік раённай вертыкалі В. С. Гутараў звярнуўся да прысутных і адзначыў, што пашырэнне плошчы “Гарызонта” бу­дзе садзейнічаць яшчэ большаму насычэнню рынку таварамі, лепшаму задавальненню патрэб пакупнікоў. Немалаважным з’яўляецца і той факт, што ў раённым цэнтры з’явілася больш за 50 новых рабочых месцаў. Віктар Сяргеевіч пажадаў прадаўцам  актыўных пакупнікоў і выказаў надзею, што работы па абнаўленні залы рынка будуць працягвацца.

На рамонт памяшкання, набыццё абсталявання, выкананне некаторых іншых работ быў затрачаны 1 мільярд 200 мільёнаў рублёў крэдытаў і сродкаў завода “Беліт”.

— Мы імкнуліся максімальна выкарыстаць усё новае, што ёсць для абсталявання рынкаў Беларусі, — адзначыў дырэктар прадпрыемства Дзмітрый Чыжэўскі. —  Новая зала выглядае больш прасторнай, а гандлёвыя месцы — больш зручнымі і адкрытымі. У яе абсталяванне будзе ўкла­дзена яшчэ не менш за 500 мільёнаў рублёў. Будзе адноўлена ацяпленне, устаноўлены кандыцыянер, прыведзена ў парадак пажарная сігналізацыя, выкананы іншыя неабходныя мерапрыемствы. На працягу блі­жэйшых месяцаў адрамантуем дах, правядзём рамонт падлогі ў суседніх залах. У недалёкай перспектыве — добраўпарадкаванне прылеглай тэрыторыі, абсталяванне стаянкі для транспартных сродкаў. Словам, будзем рабіць усё магчымае, каб наш “Гарызонт” па-ранейшаму быў папулярным, вабіў прадпрымальнікаў і пакупнікоў.

Тэкст і фота

 Пятра КУРЫЛОВІЧА.