Прырасла “Сасноўка” соснамі

Больш за 12 тысяч ямак мячамі Колесава падрыхтавалі за лічаныя гадзіны работнікі Пастаўскага і Лынтупскага лясніцтваў

З 5 па 12 красавіка на Пастаўшчыне, як і ва ўсёй краіне, прайшоў “Тыдзень лесу-2014”, прысвечаны 70-годдзю вызвалення Беларусі ад нямецка-фашысцкіх захопнікаў. Разам з работнікамі лясной гаспадаркі ў добраахвотнай акцыі пад дэвізам “Пасадзі дрэва на мірнай зямлі”  ўдзельнічалі вучні СШ №4, Лынтупскай, Камайскай, Гуцкай, Старадворскай і іншых школ. А найбольш масавы “дэсант” з ліку васьмі- і дзевяцікласнікаў СШ №1 “высадзіўся” ў суботу ва ўрочышчы “Сасноўка”.

У свой час тут быў  пясчаны кар’ер, якім карысталіся філіял “ДРБУ-132”, ДЭУ-33, прадпрыемства меліярацыйных сістэм, АБП “Рассвет Пастаўскі”, УП ЖКГ і іншыя арганізацыі. Пасля яго выпрацоўкі засталася пустэча плошчай больш за тры гектары. З цягам часу несумленныя грамадзяне пачалі звозіць сюды смецце. Тэрыторыя паступова ператваралася ў несанкцыянаваную звалку. Па ініцыятыве кіраўніцтва лясгаса, якую падтрымаў старшыня райвыканкама В. С. Гутараў, сіламі распрацоўшчыкаў кар’ера былі праведзены яго рэкультывацыя і ачыстка ад смецця. На гэтым месцы вырашылі пасадзіць лес. Глебу загадзя падрыхтаваў механізатар  Віталій Лысёнак, а ў суботу —  у апошні дзень рэспубліканскай акцыі — тут дружна закіпела работа.

Больш за 70 вучняў і педагогаў СШ №1 (яшчэ 25 школьнікаў былі накіраваны ў Груздаўскае лясніцтва)  у “Сасноўцы” віталі дырэктар лясгаса Уладзімір Місачэнка, галоўны ляснічы Валерый Гарбуль, намеснік дырэктара па ідэалагічнай рабоце Аляксандр Іванькоў, ляснічы Пастаўскага лясніцтва Альберт Туронак, спецыялісты лясной гаспадаркі. Потым яны разам з дзець­мі садзілі лес.

На першым этапе школь­нікаў падзялілі на дзве групы (адна займалася ўборкай лесу), а затым юныя памочнікі працавалі разам. Арганізатары акцыі паклапаціліся пра тое, каб не было ніякіх затрымак у рабоце. Перад яе пачаткам майстар лесу Павел Казаровец і інжынер па якасці Іван Андрушкевіч правялі інструктажы, расказалі пра правілы пасадкі саджанцаў. Праца рабят аблегчылася дзякуючы таму, што наперадзе іх з галоўным  інвентаром для пасадкі лесу  — мячамі Колесава — ішлі работнікі Пастаўскага і Лынтупскага лясніцтваў. Імі было зроблена больш за 12000 ямак. Столькі саджанцаў сасны з уласнага лясгасаўскага гадавальніка і  пасадзілі школьнікі.

— Раней вучні ў асноўным займаліся ачысткай лесу ад смецця, — расказвала намеснік дырэктара па выхаваўчай рабоце СШ №1 Марына Будзько. — Сёлета з задавальненнем прынялі запрашэнне кіраўніцтва лясгаса прыняць удзел у пасадцы лесу. Мабыць, сёння яшчэ не кожны ўсведамляе важнасці  гэтай работы. Але пераканана, што з цягам часу ўдзельнікі культурна-экалагічнай акцыі, наведваючы “Сасноўку”,  будуць з гонарам гаварыць, што тут растуць пасаджаныя імі дрэўцы.

— Лес з’яўляецца адзіным аднаўленчым у краіне рэсурсам, — адзначыў дырэктар лясгаса Ула­дзімір Місачэнка. — Памятаючы пра гэта, штогод вядзецца вялікая работа па аднаўленні лясных угоддзяў. Вось і ў нашым лясгасе сёлетняй вясной са­джанцы сасны, елкі, ліпы, ясеня будуць пасаджаны на 120 гектарах. Што датычыць “Тыдня лесу”, то гэта акцыя добраахвотная. Мы вельмі задаволены тым, што маем столькі юных памочнікаў. Гэта дзякуючы і ім работа па пасадцы лесу на Пастаўшчыне будзе завершана да 20 красавіка.

Тэкст і фота Пятра КУРЫЛОВІЧА.