Новы цэх – гонар завода

Для калектыву ААТ “Пастаўскі малочны завод” 2013 год знакавы. Акрамя таго, што прадпрыемства працавала стабільна і выпускала добра вядомую ў краіне і за яе межамі прадукцыю пад гандлёвай маркай “Паставы Гарадок”, якая, як і ў папярэднія гады, была адзначана дыпломамі і іншымі ўзнагародамі прэстыжных выстаў і конкурсаў, тут ажыццёўлена самая маштабная за ўсю папярэднюю гісторыю мадэрнізацыя вытворчасці. Уведзены ў эксплуатацыю новы сырны цэх магутнасцю 20 тон сыру ў суткі (пакуль выпускаецца 8 тон). Пабудаваны сам цэх, камера паспявання сыроў. Асвоена 210 мільярдаў рублёў, засталося асвоіць 19,5 мільярда рублёў. Завяршаюцца работы на будаўніцтве лініі па нарэзцы і ўпакоўцы сыроў, станцыі абезжалезвання вады, каналізацыйна-помпавай станцыі. Аб’екты наступнага года — прахадная і павільён для адгрузкі сыроваткі.

Сырароб Г. С. Дабравольская і майстар Л. А. Савіч

— Безумоўна, новы сырны цэх — гэта важкае дасягненне і гонар завадчан, — гаворыць дырэктар адкрытага акцыянернага таварыства В. Ф. Пылінскі. — Яго ўвод дазволіць нам значна павялічыць аб’ёмы перапрацоўкі сыравіны і выпуску гатовай прадукцыі, павысіць яе якасць і пашырыць рынкі збыту, у тым ліку ў Расію. У той жа час занепакоены тым, што наяўная сыравінная зона не здольна забяспечыць завод патрэбнай колькасцю малака — 200 тон, а з улікам натуральнамалочнай прадукцыі — 250 тон у суткі (цяпер маем у сярэднім 100 тон). Вырашаць пытанне трэба ўжо. Вялікія надзеі ўскладваем на рэканструкцыю і будаўніцтва малочнатаварных ферм, якія будуць аснашчаны сучасным абсталяваннем, укамплектаваны жывёлай. Будзем працягваць закупляць малако ў насельніцтва, але і ў гэтым плане сітуацыя складваецца не лепшым чынам: на вёсцы змяншаецца пагалоўе жывёлы, моладзь не надта хоча абцяжарваць сябе асабістымі падвор’ямі.

Цэх, дзе раней выпускалі цвёрдыя і паўцвёрдыя сыры, пакуль закансерваваны. Але праз некаторы час пры дастатковай колькасці якаснай сыравіны ён, магчыма, запрацуе, і паўцвёрдыя сыры зноў з’явяцца ў гандлёвай сетцы. Што датычыць новай прадукцыі, то яе плануецца выпускаць 19 найменняў (пакуль — 7-8). Сыры рэалізуюцца на тэрыторыі Беларусі, першыя тоны паступілі ўжо і на расійскі рынак. Якасць прадукцыі задавальняе спажыўцоў, і я не магла не пацікавіцца ў кіраўніка, што ж у аснове поспеху?

— Адказнасць кожнага работніка, — лічыць В. Ф. Пылінскі. — Калектыў у нас цудоўны, і пра гэта сведчыць ужо той факт, што тыя ж самыя людзі, якія былі заняты ў сырнай вытворчасці, за кароткі тэрмін асвоілі новае абсталяванне вядучых еўрапейскіх вытворцаў, новыя тэхналогіі, за што я ўдзячны маім намеснікам, спецыялістам, усім, хто займаецца паляпшэннем якасці прадукцыі. Дзякуй і сельгасвытворцам — кіраўніцтву гаспадарак, жывёлаводам. Жадаю ўсім моцнага здароўя і дабрабыту, поспехаў ва ўсіх справах. З Новым годам!

Галіна ПІШЧ.

Фота Алены Шапавалавай.