У Паставах упершыню прайшоў конкурс каляднай песні (+ фота)

28 снежня ў Доме культуры па вуліцы Станкевіча адбыўся парафіяльны конкурс каляднай песні “Святло Божага Нараджэння”, у якім прынялі ўдзел 17 юных пастаўчанак. Самай малодшай, Таразевіч Кацярыне, 7 гадоў, а самай старэйшай, Зібаравай Марыі, — 17. 

Адкрываючы конкурс, ксёндз-дэкан А.Возьняк сказаў: “Кожная калядная песня — гэта кавалачак Евангелля, і мы, спяваючы калядныя песні, нясём іншым, якія нас слухаюць, Добрую Вестку. Такім чынам становімся апосталамі Езуса Хрыста. Такімі ж маленькімі апосталамі, місіянерамі будуць і нашы канкурсанткі. Гэта першы парафіяльны конкурс калядак. Будзем спадзявацца, што ў наступныя гады ён пашырыцца, у ім прымуць удзел іншыя парафіі”.

Усе ўдзельніцы хваляваліся, вельмі адказна ставіліся да сваёй місіі, стараліся як найлепш перадаць настрой і вобразы песні. Да конкурсу іх рыхтавалі музычныя кіраўнікі Касарэўская Вольга і Кватарчук Вольга, для многіх дзяцей падбірала песні сястра Канстанцыя.

Усе ўдзельнікі былі падзелены на тры ўзроставыя групы. Пераможцай у малодшай групе стала Таразевіч Кацярына, якая была ўзнагароджана дзіцячымі цымбаламі. У сярэдняй групе перамагла Ожаль Юлія, у старэйшай — Шуцілава Марта. Абедзве атрымалі ў якасці прызоў акустычныя гітары. А Дзіяна Дунец — прыз глядацкіх сімпатый  — рукзак. Таксама ўсе іншыя ўдзельні­­цы атрымалі дыпломы 2 і 3 ступеняў, плэеры і пакункі цукерак.

На працягу ўсяго конкурсу ў зале панавала асабліва цёплая, зычлівая і радасная атмасфера. Кожнае выступленне адзначалася дружнымі апладысментамі. А калі журы выйшла для абмеркавання вынікаў, на сцэну паднялася група касцельнай моладзі разам з сёстрамі, і ўся зала спявала з моладдзю калядкі.

“Цудоўна тое, што конкурс адбыўся, — адзначыў член журы, дырэктар музычнай школы А. А. Собаль. — Атрымалася свята дзіцячай творчасці. Дзеці стараліся, адчуваецца добрая падрыхтоўка. Сярод іх ёсць і больш здольныя, і менш. Але, напэўна, кожная зразумела, як шмат трэба працаваць, каб перамагчы. Усе яны заслугоўваюць слоў падзякі. Арганізатарам конкурсу зычу, каб ён атрымаў шырэйшыя маштабы, каб да такога свята далучы­ліся іншыя парафіі”.

“Нам у жыцці не хапае радасных песень, радасных вестак, прасякнутых любоўю да бліжняга, — сказаў намеснік старшыні райвыканкама Ю. М. Кісялёў.  — Таму хацелася б, каб такіх мерапрыемстваў было як мага больш. Мы, дарослыя, хваляваліся разам з дзецьмі. Конкурс цікавы і карысны. Ён для людзей і для Бога”.

Пераможцы конкурсу будуць прадстаўляць нашу парафію на дыяцэзіяльным конкурсе каляднай песні “Бэтлеемская зорка”, які адбудзецца ў Міёрах 4 сту­дзеня.  Памолімся за іх і пажадаем ім поспехаў.

  Аліна ЛАТЫШ,

 няштатны карэспандэнт. Фота Пятра КУРЫЛОВІЧА.