Лынтупскія ляснічыя справілі наваселле (+фота)

24 снежня на базе Пастаўскага лясгаса прайшоў абласны семінар, падчас якога кіраўнікі лясгасаў Прыдзвінскага краю азнаёміліся з развіццём інфраструктуры паляўнічых гаспадарак у Лынтупскім, Старадворскім і Варапаеўскім лясніцтвах. А перад гэтым разам з гаспадарамі  прысутнічалі на ўрачыстай цырымоніі  адкрыцця адміністрацыйнага комплексу Лынтупскага лясніцтва.

Комплекс вырас на ўскрайку лесу пры ўездзе ў гарадскі пасёлак з боку Пастаў. За паўтара года будаўнікі ўзвялі адміністрацыйны будынак, гаражы, альтанку, кацельню, пункт проціпажарнага інвентару, устанавілі агароджу, праклалі дарожкі. Забудова атрымалася прыгожай, сучаснай і вельмі запатрабаванай, бо ранейшае памяшканне лясніцтва эксплуатавалася амаль 75 гадоў.

— 2013-ы з’явіўся годам актыўнай работы па ўкладванні інвестыцый у асноўны капітал, — адзначыў на наваселлі дырэктар лясгаса Уладзімір Місачэнка. —  Асноўны іх аб’ём мы накіравалі на набыццё машын, абсталявання і транспартных сродкаў, правядзенне будаўніча-мантажных работ, развіццё інфраструктуры паляўнічай гаспадаркі. Толькі ва ўзвядзенне адміністрацыйнага комплексу Лынтупскага лясніцтва ўкладзены 1 мільярд 661 мільён рублёў. Сродкаў не шкада, бо людзі нарэшце змогуць працаваць у цывілізаваных умовах, ды і наведвальнікаў цяпер не сорамна прымаць.

Падзеяй не толькі мясцовага значэння назвалі адкрыццё адміністрацыйнага комплексу ў Лынтупах генеральны дырэктар абласнога вытворчага лесагаспадарчага аб’яднання Сяргей Даніловіч і старшыня раённага Савета дэпутатаў Віктар Арэхаў, якія разам з дырэктарам лясгаса Уладзімірам Місачэнкам перарэзалі чырвоную стужку. Ляснічаму Рышарду Пецюлевічу былі ўручаны сімвалічны ключ ад комплексу, а таксама падарункі — два камп’ютары і бензапіла.

Госці прайшліся па тэрыторыі комлексу, наведалі галоўнае памяшканне, дзе размешчаны рабочыя кабінеты, пакой для адпачынку, санітарны вузел і іншыя. Яны абсталяваны мэбляй Варапаеўскага дрэваапрацоўчага камбіната. Як адзначыў Рышард Пецюлевіч, на ўзвядзенні аб’екта стараліся выкарыстоўваць уласную драўніну, шэраг заказаў быў выкананы ААТ “Паставымэбля”. Вясной на тэрыторыі комплексу сваімі сіламі будуць пасаджаны туі, закладзены невялікі дэндрапарк, зроблены газон, кветнікі.

— У 2014-ым нашаму лясніцтву споўніцца 75 гадоў, — адзначыў Р. Пецюлевіч. — Да гэтай даты мы атрымалі выдатны падарунак. Зробім усё для таго, каб тэрыторыя комплексу была яшчэ больш прыцягальнай, а набыткі ў працы — больш важкімі.

 Тэкст і фота Пятра КУРЫЛОВІЧА.