Не хочешь платить — выселяйся

2 сакавіка 2013 года ў рэспуб­ліцы пачаў дзейнічаць новы Жыллёвы кодэкс. У параўнанні з папярэднім ён істотна вырас у аб’ёме, дзякуючы павелічэнню колькасці артыкулаў, і больш дэталёва стаў рэгуляваць жыллёвыя адносіны. У прыватнасці, вялікая ўвага ў новым заканадаўчым акце ўдзелена пытанням неўнясення грамадзянамі платы за карыстанне жылымі памяшканнямі, у якіх пражываюць, і платы за жыллёва-камунальныя паслугі.

Толькі ў адным Пастаўскім раёне такіх неплацельшчыкаў набярэцца некалькі дзясяткаў. Прозвішчы большасці іх добра вядомы чытачам раёнкі, бо фігурыруюць у кожным спісе, які друкуе на сваіх старонках газета. Неплацяжы асобных наймальнікаў і ўладальнікаў жылля доўжацца гадамі і разам з пеняй складаюць 10-15 мільёнаў рублёў. Можна ўявіць сабе, якія страты нясе з-за гэтага дзяржаўны бюджэт! Раней, падчас дзеяння старога Жыллёвага кодэкса, камунальшчыкі мелі менш рычагоў уздзеяння на неплацельшчыкаў — фактычна маглі толькі адключыць ім газ, ваду і святло. Але такія меры слаба дапамагалі. Цяпер жа ў раённых і гарадскіх улад з’явілася рэальная магчымасць высялення названых грамадзян.

Так, у адпаведнасці з новым Жыллёвым кодэксам Рэспублікі Беларусь, наймальнік жылога памяшкання дзяржаўнага жыллёвага фонду і члены яго сям’і, якія пражываюць разам з ім, маючы без уважлівых прычын шасцімесячную запазычанасць па плаце за жыллёва-камунальныя паслугі і карыстанне жылым памяшканнем, падлягаюць высяленню ў судовым парадку з прадастаўленнем ім іншага жылога памяшкання, меншага па плошчы і горшага па сваіх спажывецкіх якасцях. Што датычыць уласніка жылога памяшкання, які на працягу 6 месяцаў без уважлівых прычын не ўносіць плату за жыллёва-камунальныя паслугі, яго спачатку абавязаны пісьмова папярэдзіць аб неабходнасці пагасіць запазычанасць. Калі ж праз месяц пасля атрымання папярэджання запазычанасць не будзе пагашана, мясцовы выканаўчы і распарадчы орган мае права падаць у суд іск аб прымусе ўласніка да адчужэння (продажу) жылога памяшкання.