С Васькой веселее

Ну і здоўжылася для Марыі Антонаўны мінулая зіма! Здавалася б, сядзі ў святле ды цяпле, пад даччыным клопатам. Дык не, кожны дзень у думках ірвалася ў свае Пятровічы, хоць разумела, што там пуста, холадна, заснежана. Затое з якой радасцю, нібыта пералётная птушка з выраю, вярнулася сюды ранняй вясной.

— Паглядзіце, які мой дом, — паказвала мне ўсцешна. — Усё вымалявана, чыста. Надта ўдалыя абедзве дачкі, зяці, унукі. На іх тут усё трымаецца, а мне такое дарагое.

Гаспадарку М. А. Грыбко ўжо не трымае. З настальгіяй успамінае, як яшчэ гадоў дзесяць таму мелі дзвюх кароў, каня, гурт авечак, некалькі свіней. Цяпер на гэта няма сіл. Гаспадар даўно памёр, а яна летась перасягнула 90-гадовы рубеж. “Ажно боязна называць свой узрост, — казала пры сустрэчы. — Але, дзякаваць Богу, яшчэ на нагах, і памяць не падводзіць”.

А дзеці мне расказалі па тэлефоне, якая аптымістка і жыццялюбка іх маці. Яна жыва цікавіцца ўсімі падзеямі, якія адбываюцца ў нашай краіне і за мяжой, узбагачаючыся інфармацыяй з тэлеэкрана. А самая любімая перадача — “Поле цудаў”. Вельмі радуецца за тых, хто выйграе прыз. Шмат ведае пра артыстаў, асабліва старэйшага пакалення. Так бы мовіць, у курсе свецкай хронікі.

Мае бабуля Марыя і гаспадарчы клопат — каня Ваську. Ён, як і гаспадыня, таксама зімаваў у горадзе і, напэўна, гэтак жа, як і яна, нудзіўся, бо ўрэшце захварэў. У Пятровічы яго даставілі вясной, як у санаторый. Антонаўна збедавалася: “Калі здохне Васька, і я памру без яго”. Сталі выходжваць. Прывозілі ветэрынара, куплялі лекі. Навязваць каняку на пашы дапамагаў сусед Іван Танана.

— І наш Васька за два месяцы ачуняў! — радуецца гаспадыня. — Ужо не кашляе, набраў вагу. Хадзем на пашу, пакажу вам свайго коніка.

Марыя Антонаўна вырывае з градкі бурак і накіроўваецца на пашу: “Васька! Васька! Я табе гасцінец нясу!”

Конь радасна іржэ ў адказ і нецярпліва, у прадчуванні прыемнай сустрэчы, пераступае нагамі.

Яго жыццё і бабуліна апека прадаўжаюцца.

Фаіна КАСАТКІНА,

Уладзімір КАЛІБАТАЎ (фота),

                                                                                        Дунілавіцкі сельсавет.