Подтвердили свою готовность

6 верасня на базе пастаўскага фізкультурна-аздараўленчага комплексу па вуліцы Савецкай адбыліся раённыя спаборніцтвы сярод добраахвотных дружын па ахове правапарадку. У іх ­удзельнічалі каманды прафтэхкаледжа, АТП № 17, УП ЖКГ, пастаўскага казацкага аддзела РГА “Беларускае казацтва”, Лынтупскага і Ярэўскага сельскіх Саветаў.

Напачатку мерапрыемства дружыннікаў прывіталі начальнік штаба добраахвотных дружын Наталля Мечыславаўна Субко і намеснік начальніка Пастаўскага РАУС Юрый Іванавіч Анкіп. Яны падзякавалі камандам за зладжанасць і актыўнасць, а таксама пажадалі сіл, вытрымкі і выдатных вынікаў.

Пасля ўрачыстага ўзняцця Дзяржаўнага сцяга Рэспублікі Беларусь і жараб’ёўкі ўдзельнікаў чакала насычаная праграма спаборніцтваў. Яны ўключылі тры этапы — спартыўна-прыкладное шматбор’е (кіданне гранаты, бег на 100 метраў і комплекс сілавых практыкаванняў), спецыяльную падрыхтоўку (складалася з тэарэтычных пытанняў па праве і медыка-санітарных нормах), перацягванне каната. 

Паўтары гадзіны фізічных і разумовых намаганняў — і вынікі мерапрыемства вядомы. Іх агучыў намеснік старшыні раённага выканаўчага камітэта Юрый Мікалаевіч Кісялёў.

—        Ахова грамадскага парадку — гэта справа не толькі аддзела ўнутраных спраў, але і гараджан, — адзначыў ён. — Радуе, што ў раёне актыўную пазіцыю занялі дружыннікі, якія і ў выхадныя, і ў святочныя дні гатовы забяспечыць спакой на нашых вуліцах. Сённяшнія спаборніцтвы пацвердзілі, што ў складзе добраахвотных дружын і маральна падрыхтаваныя, і фізічна загартаваныя людзі. Вы паказалі дастойныя вынікі, праявілі свае найлепшыя якасці. Дзякуй за нераўнадушныя адносіны да сваіх абавязкаў. Няхай ваш прафесіяналізм штогод толькі прымнажаецца.

Ю. М. Кісялёў уручыў граматы і каштоўныя падарункі прызёрам. Імі сталі каманда прафтэхкаледжа (трэцяе месца), Ярэўскага сельскага Савета (другое). Першай стала дружына пастаўскага казацкага аддзела рэспубліканскай грамадскай арганізацыі “Беларускае казацтва”, якую справядліва назвалі прыкладам мужнасці і патрытызму, актыўнай пазіцыі ў выхаванні падрастаючага пакалення.

Арганізатары спадзяюцца, што ў наступным годзе мерапрыемства бу­дзе больш шматлікім, бо ўсяго ў раёне створаны дваццаць дзве дружыны, якія аказваюць садзеянне работнікам РАУС. Літаральна месяц назад арганізавана яшчэ пяць новых — лынтупская, палеская, ярэўская, мягунская і мулярская, якія будуць дапамагаць несці службу паграніч­нікам.

Іна СНЯЖКОВА.

Фота аўтара.