С молодым задором

Рабяты з Варапаева лічаць, што ў працы ім дапамагаюць сяброўства і добры настрой.

Чацвёрты год Варапаеўская СШ заключае дагаворы з ААТ “Навасёлкі-Лучай” аб аказанні дапамогі ва ўборцы ўраджаю. Вось і сёлета, пачынаючы з 5 верасня, у рабочыя дні ў сельгаспрадпрыемства прыязджае па 40-45 старшакласнікаў. Яны па чарзе працуюць да і пасля абеду, што дазваляе на працягу дня больш прадукцыйна выкарыстоўваць транспарт.

— За сем дзён вучні адпрацавалі 270 чалавека-дзён, падабралі 121 тону бульбы, — расказваў дырэктар школы В. М. Жук. —  Усе стараюцца, працуюць актыўна. Гэтаму садзейнічаюць дакладная арганізацыя працы,  своечасовая дастаўка дзяцей у поле.

Пра тое самае гаварыла і намеснік дырэктара СШ №2 па выхаваўчай рабоце Н. Ф. Семянас. Вучні гэтай школы (а на мінулым тыдні кожны дзень працавала ў сярэднім па 60 чалавек) падабралі за капалкай 180,5 тоны бульбы. Прыкладам для іншых служыць выпускніца Анжаліка Кастрова. Яе дзённая выпрацоўка складае да тоны і больш клубняў.

Адзінаццацікласнікі пастаўскай СШ №2 — лідары на ўборцы бульбы.

Рупяцца на бульбяным палетку вучні Навасёлкаўскай СШ. Дырэктар навучальнай установы В. М. Пяткевіч расказала, што на ўборцы кожны дзень працуе ў сярэднім па 20 дзяцей. Яны падбіраюць за капалкай па 15-17 тон бульбы, што значна перавышае норму выпрацоўкі.

З начальнікам аддзялення Вячаславам Мялешкам назіралі за работай гэтага сельскагаспадарчага атрада. Кіраўнік падраздзялення адзначыў, што ў полі стараюцца ўсе, але ўсё ж найлепш атрымліваецца ў навасёлкаўскіх школьнікаў, якія змалку дапамагаюць старэйшым. Вось і ў той дзень вучні 9—11 класаў мясцовай школы па тэмпах і якасці работы апярэджвалі іншых. Здавалася, што ўсе працуюць увішна, але індывідуальны ўлік паказаў, што  найбольш бульбы набіраюць Алена Мацур, Андрэй Ластоўскі, Анастасія Праліч, Дзяніс Колтан, Марыя Літвіновіч, Анатолій Катовіч, Надзея Дунец, Кацярына Раковіч, Кірыл Бугай.

Такой дружнай сям’ёй працуюць старшакласнікі Навасёлкаўскай сярэдняй школы.

Рабочы дзень школьнікаў — з 9 да 14 гадзін, а тыдзень — пяць рабочых дзён. Працаваць больш часу не дазваляе заканадаўства. Але старшакласнікі з Навасёлак знайшлі выйсце. 14 верасня на Пастаўшчыне быў аб’яўлены раённы суботнік. Паўдзельнічаць у ім на ўборцы бульбы выказалі жаданне большасць членаў навасёлкаўскага сельскагаспадарчага атрада. Гэта ініцыятыва была ацэнена дырэкцыяй прадпрыемства двайной аплатай. Карысць атрымалася ўзаемнай.

Для таго, каб завяршыць уборку бульбы на гэтым тыдні, трэба падбіраць за дзень клубні на 5 гектарах. З панядзелка на дапамогу прыйшлі вучні сярэдняй школы №4. На школьнікаў і навучэнцаў Пастаўскага прафтэхкаледжа цяпер уся надзея. Кіраўніцтва і спецыялісты ААТ спадзяюцца, што моладзь не падвядзе і ў далейшым.

Тэкст і фота Пятра КУРЫЛОВІЧА.