С гектара — 354 центнера

Усяго пяць гектараў займала сёлета бульба ў ААТ “Хацілы-агра”. Затое ўраджай на іх вырас такі, які іншым гаспадаркам і з утрая большай плошчы не сабраць — кожны гектар даў па 354 цэнтнеры клубняў сорту “ўладар”.

Даведаўшыся пра хацілаўскі рэкорд, адправіліся ў гаспадарку. І, які жаль, спазніліся — бульбяны палетак ужо быў нават закультываваны.

— А вы паглядзіце, колькі мы бульбы накапалі, — прапанавала галоўны аграном Надзея Міхайлаўна Кірплюк (на здымку). — Увесь склад засыпалі. Цяпер будзем мець клопат, як прадаць.

З уборкай “другога хлеба” ўправіліся менш чым за тыдзень. Спрыяла надвор’е, стараліся на капалках і адвозцы бульбы механізатары Віктар Кобзік (дарэчы, ён і садзіў бульбу, і даглядаў яе), Мікалай Чашун, Андрэй Курто. Не падвялі юныя памочнікі — навучэнцы 205-ай і 206-ай груп Пастаўскага прафтэхкаледжа.

Ну, а як удалося вырасціць такі багаты ўраджай? На гэта пытанне Надзея Міхайлаўна адказала наступнае: “На чарговых занятках у рэспубліканскім клубе аграномаў прафесар з Літвы парэкамендаваў нам выкарыстаць для апрацоўкі пасеваў прэпарат “Амінакат” іспанскай вытворчасці. Гэта свабодныя амінакіслоты, здабытыя з водарасцей. З “Амінакатам” працуюць цяплічныя камбінаты. Прэпарат дарагі, але ж і аддача ад яго каласальная. З вясны пасевы бульбы ў нас былі зусім незайздросныя. А апрацавалі “Амінакатам” адзін раз, затым другі — і вось вынік”.

Найперш жа гэтым прэпаратам у гаспадарцы падкармілі пшаніцу, кукурузу, і яны таксама выдатна ўрадзілі. Зразумела, строга захоў­валася і тэхналогія вырошчвання ўсіх культур. Такім чынам, сінтэз навукі і вытворчасці даў важкі плён.

Фаіна КАСАТКІНА.

Уладзімір Калібатаў (фота).