В областном конкурсе — третья

5-6 верасня ў Глыбокім адбыўся абласны конкурс сярод прадаўцоў харчовых і нехарчовых тавараў. Пастаўскае райспажыўтаварыства прадстаўляла Алена Лелет з магазіна “Азёрны”. Прадстаўляла годна. Сярод дваццаці дзвюх удзель­ніц яна стала трэцяй і цяпер рыхтуецца да рэспубліканскага этапа спаборніцтваў, правядзенне якога запланавана на лістапад.

Эмоцыі перапаўняюць дзяўчыну і сёння. Цяпер ужо з усмешкай успамінае, як моцна хвалявалася, як трэсліся рукі перад кожным этапам конкурсу. А яны праводзіліся два дні. У першы патрабавалася расказаць пра сябе і свой шлях у прафесію — паказаць «візітку», а таксама адказаць на пытанні журы і прарэкламаваць тавар, які дастаўся па жэрабю. Другі дзень прафесійных спаборніцтваў праходзіў у глыбоцкім магазіне “Родны кут”. Канкурсанткі павінны былі прадэманстраваць майстэрства выкладкі тавараў, а таксама падрабязна расказаць пра адзін з іх — назваць тэмпературу і тэрміны захоўвання, састаў, аднесці да пэўнага віду класіфікацыі… Што стане аб’ектам характарыстык, загадзя прадаўцы не ведалі.

— Калі мне сказалі, што менавіта я буду прадстаўляць раён на конкурсе, вельмі перажывала, — прызнаецца Алена. — Вопыту ўдзелу ў такіх мерапрыемствах у мяне не было. Таму на падрыхтоўку патраціла шмат часу. І танец развучвала, і песню, што для мяне новае і нязвыклае. Радасна, што намаганні былі недарэмнымі. Прыемна ўражана высокім узроўнем арганізацыі конкурсу, дружалюбнасцю канкурсантак. Адным словам, вельмі спадабалася. З задавальненнем паехала б зноў!

Падчас размовы Алена неаднойчы падкрэсліла, што прызавое месца яна заняла толькі дзякуючы вялікай падтрымцы намесніка старшыні праўлення райспажыўтаварыства Ганны Мечыславаўны Сянько, юрыста Людмілы Мікалаеўны Касцюковай, тавараведа “Каапгандлю № 2” Святланы Аляксееўны Гідровіч, якія дапамаглі падрыхтавацца да конкурсу, а таксама маральна падтрымлівалі падчас яго правядзення.

У сферы гандлю Алена Лелет працуе ўжо больш за пятнаццаць гадоў, хаця першапачаткова вучылася на швачку. Але ў сваёй цяперашняй прафесіі не расчаравалася. Наадварот, хоча ў ёй удасканальвацца, вучыцца прафесіяналізму ў старэйшых калег. А калі ёсць такое жаданне, значыць не за гарамі новыя перамогі.

Іна СНЯЖКОВА.

                                                                                                                             Фота прадастаўлена Аленай ЛЕЛЕТ.