20 найбольш цікавых і невядомых фактаў пра мастака, этнографа, археолага Язэпа Драздовіча, ураджэнца Глыбоччыны

Іх сабраў малады беларускі драматург Васіль Дранько-Майсюк.

Пра гэта паведамляе сайт “Радыё Свабода”.

Цікавыя і невядомыя факты:

1) Быў мастаком, краязнаўцам, небазнаўцам, пісьменнікам, паэтам, скульптарам, графікам, педагогам, кніжным ілюстратарам.

2) Сябраваў з Янкам Пачопкам, Міхасём Машарам, Максімам Танкам, Пятром Сергіевічам, але з другой паловы 30-х расчараваўся ў сяброўстве не вельмі чулых і ўважлівых да яго таварышаў ("...я...бессямейны і бясхатні... горай "трупа", якім мяне тут...пачалі называць. Ды каб хто, свае, пісьменнікі, якіх я гады два таму партрэты выразьбаваў для Музея, за тое, што я (не маючы ані свайго кута, ані забяспечанага часу) – "не твару"... Хамства"; "...Міхась Звінячы (Машара) нагнаў мне... чэрствасці. А па-за ім, бадай, чуць не ўсе віленскія тузы-беларусы, не выключаючы між імі і найбліжэйшага мне калегу Пецю Сергіевіча, якога я калісь, яшчэ як быў ён студэнтам, наколькі мог, заўсёды стараўся відзець сабе другам. А ён цяпер, як вырас у мастака, пачуўшы сябе "знамянітым", зусім "дзюдкай" аказаўся...").

3) Быў выдатным танцорам ("На вечарынцы госці вялі сябе прыстойна, па-культурнаму, весела, ветліва і развязна. Танцавалі і пяялі. У канцы канцоў, гледзячы на рэшту маладых, і мне "старыку" скакануць закарцела, выпрабаваць лёгкасць сваіх ног на казачку ды паказаць маладым, як мы "даўней" скакалі. Скінуў з валёнкаў галёшы і таксама скакануў з куляннем на рукі, калясом, у перамежку – на зайздрасць маладым").

4) Вельмі любіў плаваць (хоць і не вельмі ўмеў). Шкадаваў, што ў Беларусі няма свайго акіяна ("Шчаслівы народ акіянцы. Шчаслівы не таму, што жывуць астраўлянамі, а шчаслівы таму, што ніколі не знаюць зімы, а мора ўмяркоўваець ім пад экватарам клімат, і яны могуць хадзіць без адзежы і ў дадатак, маючы мора пад носам, – купацца і купацца. Ці ж у гэтым не райскае жыццё?").

5) Не любіў, калі маладзенькія дзяўчаты мазаліся памадай.

6) Сябраваў з Бахусам (Максім Танк, жартуючы, казаў, што Драздовіч назірае за зоркамі не праз тэлескоп, а праз рыльца бутэлькі).

7) Усё жыццё змагаўся з голадам і нястачай.

8) Меў не вельмі добры зрок – дальназоркасць (часта ў падарожжах губляў акуляры).

9) Іранічна ставіўся да варажбітоў і хірамантаў.

10) Адным з найвялікшых грахоў лічыў забойства нявіннай жывёлы і птушкі.

11) Вандроўнае жыццё і заўсёдная нястача не далі здзейсніцца ягонай мары – ажаніцца.

Аўтапартрэт Язэпа Драздовіча

12) Вельмі шкадаваў, што Эфіопія прайграла вайну з мусалініеўскай Італіяй ("Японія не спіць, а Абісінія праспала сваю долю, каб быць у Афрыцы тым, чым цяпер у Азіі Японія. Спазніліся на некалькі вякоў.").

13) Самым неэстэтычным зверам лічыў гіену.

14) Адна кабета высмеяла на адным балі лапленыя штаны Драздовіча:
"Я й раней яму казала,
Каб ён водачкі не піў.
І не быў як той манах,
Бо ўся сіла ў штанах".

15) Не ўмеў іграць у карты.

16) Жыццё на Марсе, Месяцы, Сатурне, Венеры бачыў у "самнамбулічных снах" і цвёрда верыў, што ўсё ўбачанае, калі не існуе зараз, то дакладна будзе існаваць у будучыні.

17) Любімы герой Драздовіча – старазапаветны Майсей ("Я люблю Майсея за ягоную маладцаватасць. Гэта адзін з наймаладцавейшых людзей, якіх ведаець гісторыя нашага свету. І найболей, што мне падабаецца ў ягонай тэорыі стварэння свету, гэта: "Бог стварыў чалавека на сваё падабенства...".

18) Доўгі час судзіўся з Навагрудскай беларускай гімназіяй, каб выплаціла грошы (600 злотых). Выйграў справу, але спагнаць заробленае не было з каго – гімназія ў 1934 г. была закрытая польскімі ўладамі.

19) Любіў чытаць сялянам лекцыі па астраноміі.

20) Не любіў звяглівых кабет ("Няма на свеце нічога брыдчэйшага, як язычлівая, сварлівая нагласць з бясстыдствам кабеты, паходзячай з гультайскага буржуазійнага асяродку, пры нізкім інтэлектуальным развіцці і маральнасці, з прэтэнзіямі дамініраваць сваім "я" над "я" іншых).

Паводле сайта “Радыё Свабода”