Заместа ўскладання кветак – пацалавалі замок

Учора жыхарам Горак не ўдалося свабодна ўскласці кветкі на магілу студэнта, які загінуў у нашым горадзе падчас паўстання пад кіраўніцтвам Кастуся Каліноўскага. Брамы дэндрапарка БДСГА зачынілі на ланцуг.

24 красавіка споўнілася 150 гадоў з таго дня, як паўстанцы-каліноўцы ўвайшлі ў Горкі. Тут іх падтрымала частка мясцовых жыхароў і студэнтаў. Адзін з іх Войцех Дамарацкі загінуў у баі з царскімі салдатамі і быў пахаваны на тэрыторыі дэндрапарка.

Штогод на магілу мужнага студэнта ходзяць людзі, каб аддаць сімвалічную даніну памяці тым, хто змагаўся за Беларусь і яе народ у розны час.

Аднак сёлета свабодна прайсці да магілы і ўскласці кветкі не ўдалося. Грамадзянам давялося паглядзець на дэндрапарк і магілу Дамарацкага толькі праз краты.

"Просім, каб ад 17.30 да 19.00 доступ да магілы быў свабодны для тых, хто неабыякавы да сваёй гісторыі, каб яны маглі ўшанаваць памяць людзей, якія змагаліся за незалежнасць і свабоду нашай краіны", – такі пісьмовы зварот напярэдадні накіравалі ў адміністрацыю акадэміі мясцовыя грамадскія актывісты.

У дадатак яны завіталі на прыём да рэктара і паабяцалі, што не парушаць грамадскага парадку ў парку. Кіраўнік БДСГА запэўніў, што не мае нічога супраць ускладання кветак на магілу Дамарацкага. Аднак 24 красавіка ў 18:00 на браме дэндрапарку вісеў ланцуг. Частка людзей засталася стаяць перад зачыненымі варотамі, некалькі чалавек пайшлі ў абход і ўсё-ткі ўсклалі кветкі на магілу студэнта.

Як стала вядома пазней, зачыніць браму дэндрапарка было вырашана ў апошні момант. Хто стаіць за прыняццем такога рашэння – пакуль невядома. Але, на жаль, выйшла досыць сімвалічна: нават праз 150 гадоў з Дамарацкім і яго марамі пра лепшы лёс для Беларусі нехта працягвае нябачны бой, а магіла мужнага студэнта застаецца за кратаванай брамай.
Антон Валадзько