Думкі на экватары аб шасцёрцы

У пачатку лета ў футбольным чэмпіянаце Беларусі – двухтыднёвы перапынак, які падвёў рысу пад першым кругам. Усе каманды правялі па адзінаццаць матчаў, таму ёсць падстава і час для таго, каб зрабіць пэўныя высновы. Але неабходна нагадаць становішча клубаў у табліцы.

Пасля другога круга каманды падзеляцца на дзве шасцёркі, першая з якіх будзе працягваць барацьбу за медалі, а другая – за права захаваць прапіску ў вышэйшай лізе. Зразумела, ледзь не ўсе ўдзельнікі чэмпіянату на старце марылі аб месцы ў першай шасцёрцы. Такая ж задача пастаўлена і перад “Тарпеда-БелАЗ”. Як бачна, пакуль аўтазаводцы не спраўляюцца. Безумоўна, імя Ігара Крыушэнкі і даволі гучная селекцыя ў міжсезонні настроілі заўзятараў аўтазаводцаў на аптымістычны лад, дабавіў упэўненасці і паспяховы старт у чэмпіянаце. Але цяпер у жодзінцаў значна больш мінорны настрой.

Вось і паспрабавалі зрабіць пэўныя высновы. Першае, што кідаецца ў вочы, гэта вельмі слабае выступленне каманды ў родных сценах. У пяці матчах толькі адна перамога і чатыры паражэнні. Але ўсе тыя, хто па-кінуў Жодзіна са шчытом, уваходзяць у першую пяцёрку чэмпіянату.

Да таго ж, прызнацца шчыра, толькі БАТЭ ледзь не па ўсіх параметрах перайграў тарпедаўцаў. Больш за тое, і з “Шахцёрам”, і са сталічным “Дынама” жодзінцы дзейнічалі першым нумарам, а вось тут у нашых землякоў існуюць пытанні. І гэта яшчэ адна праблема, якую патрэбна вырашыць. На жаль, пакуль, нягледзячы на вялікую колькасць вопытных футбалістаў, не знайшлося лідэра, які здолеў бы ўласным прыкладам павесці аднаклубнікаў за сабой. Тое ж самае можна сказаць і аб характары каманды. Яшчэ ні разу, калі нашы прапускалі першымі, яны не здабылі ні аднаго ачка. Зразумела, гэта трывожыць. Будзем спадзявацца, што трэнерскі штаб здолее вырашыць гэтыя пытанні.

І напрыканцы – крыху пазітыва. У другім крузе “Тарпеда-БелАЗ” у гасцях будзе гуляць з лідэрамі, а значыць, верагодна, будзе дзейнічаць ад абароны, што ў нашай каманды атрымліваецца лепш. Дома ж аўтазаводцы будуць прымаць суседзяў па табліцы, а гэта ажыўляе надзеі на перамогі. Нам застаецца сваёй падтрымкай дапамагчы тарпедаўцам вырашыць пастаўленыя задачы.

Так, ужо 15 чэрвеня ў суботу на сваім полі “Тарпеда-БелАЗ” будзе прымаць ФК “Мінск”. Пачатак – 18 гадзін 30 хвілін. Да сустрэчы на стадыёне.

Сяргей Пузанкевіч