Выпрабаванне чэмпіёнам завалілі

31 мая, Жодзіна, ст-н “Тарпеда”, 3200 гледачоў, суддзя – І.Крук (Маладзечна), “Тарпеда-БелАЗ” Жодзіна – БАТЭ Барысаў – 0:3. Галы: 52 хв., Алексіевіч – 0:1; 62 хв., Паўлаў – 0:2; 79 хв., Радзіёнаў – 0:3.

“Тарпеда-БелАЗ”: Часноўскі, Мендзі (64 хв., Лявіцкі), Чараднічэнка, Панкавец, Сучкоў (62 хв., Селява), Глеб, Шчагрыковіч, Казлоў, Каршакевіч, Ерхан, Платонаў Дзм. (73 хв. Васькоў).

Аб жодзінска-барысаўскім супрацьстаянні казалася ўжо не раз і ведаюць аб ім, мабыць, усе прыхільнікі спорта №1. Толькi вось вынікі матчаў геаграфічных суседзяў апошняе дзесяцігоддзе нагадваюць вуліцу з аднабаковым рухам, і рух гэты, на жаль, не ў наш бок. Мінулагодняя перамога ў 1/8 Кубка Беларусі – адзінае, што пакуль грэе сэрцы жодзінскіх заўзятараў.

Гэтай гульнёй каманды завяршалі першы круг. Даволі нечакана было бачыць БАТЭ не на першым месцы ў табліцы чэмпіянату, таму  аб ніякай недаацэнцы  “жоўта-сініх” гаворкі не магло ісці. Настроены былі госці вельмі рашуча, праўда, і аўтазаводцам адступаць не было куды.

З першых хвілін барысаўчане, прымяняючы высокія хуткасці, рашуча завалодалі ініцыятывай і перавялі развіццё асноўных падзей на палову поля тарпедаўцаў. Нашы землякі былі вымушаны шмат рухацца без мяча і растрачваць на гэта сілы. Дзесьці ў сярэдзіне першай паловы гаспадары здолелі прыйсці ў сябе і пажадалі нагадаць, хто гаспадар у гульні. На жаль, небяспека ля варот Гарбунова ўзнікала рэдка, і рэалізаваць гэтыя нешматлікія моманты нашы не здолелі.

А пасля перапынку БАТЭ яшчэ больш павялічыла націск, і наша абарона не вытрымала. Дарэчы, не ў аднаго мяне склалася ўражанне, што сілы большасць тарпедаўцаў пачалі пакідаць пасля 60 хвілін. А адкрыў лік выхаванец жодзінскага футбола Ілля Алексіевіч, выкарыстаўшы дакладны пас Няхайчыка. Неўзабаве Панкавец меў добрую магчымасць, каб аднавіць інтрыгу ў паядынку, але замест удара па варотах зрабіў прастрэл. Госці ж свае шансы выкарысталі і к 80-й хвіліне давялі лік да разгромнага. Стварыць што-небудзь падобнае на фінішны націск аўтазаводцам таксама не ўдалося.

Такім чынам, “Тарпеда-БелАЗ” атрымала чацвёртае запар паражэнне ў родных “сцянах” і апусцілася яшчэ ніжэй у табліцы.

Зараз у чэмпіянаце з-за матчаў зборных невялікі перапынак, таму наступную гульню “Тарпеда-БелАЗ” правя-дзе ў Жодзіне 15 чэрвеня, калі будзе прымаць ФК “Мінск”. Пачатак у 18.30.

Сяргей Пузанкевіч