Апладысменты прайграўшым

“Тарпеда-БелАЗ”: Сцяпанаў, Мендзі (87 хв., Селява), Чараднічэнка, Панкавец, Глеб (67 хв., Сакрэт), Лявіцкі, Шчагрыковіч, Яцкевіч, Ерхан, Васькоў, Каршакевіч.

Крыўднае паражэнне ў Брэсце прымусіла Ігара Крыўшэнка правесці даволі значныя змены ў стартавым складзе. Разам з дыскваліфікаваным Сучковым сваё месца ў першых адзінаццаці згубілі яшчэ Чалядзінскі, Казлоў, Селява і Сакрэт.

На жаль, надвор’е ўнесла істотныя змены са знакам мінус у гэты матч. Ліўшы два дні запар дождж не мог не адбіцца на стане газона, але гэта не перашкодзіла камандам паказаць футбол добрай якасці.

З першых хвілін аўтазаводцы па-гаспадарску прыбралі ініцыятыву да сваіх рук і пачалі рэгулярна ствараць галявыя моманты. Двойчы пасля ўдараў Шчагрыковіча і Глеба толькі абаронцы, якія кідаліся на мяч як на амбразуру варожага дзота, не далі яму магчымасці трапіць у сетку. А калі Чараднічэнка галавой замыкаў навес з вуглавога, цудоўна згуляў Гутар. Ён жа выратаваў мінчан і пасля ўдару галавой у падзенні Васькова. А вось пасля бліскучай камбінацыі аўтазаводцаў, якую замыкаў наш капітан Дзмітрый Шчагрыковіч, і галкіпер дынамаўцаў капітуляваў.

Госці ж свой першы па-сапраўднаму галявы момант рэалізавалі. Бычанок з вельмі спрэчнага штрафнога ўдару аднавіў раўнавагу. На гэтым апаснасці ля абодвух варот не спыніліся, але галоў да перапынку гледачы больш не ўбачылі.

Другі тайм выдаўся не менш багатым на падзеі. Спачатку на працягу адной хвіліны сапернікі абмяняліся галявымі ўколамі. На па-більярднаму дакладны ўдар румынскага легіянера мінчан Курэлеа тарпедаўцы адказалі выніковым розыгрышам вуглавога. Пасля падачы Глеба мяч замітусіўся ў штрафной пляцоўцы, пакуль Валерый Каршакевіч не пераправіў яго ў вароты. Было бачна, што нічыйны лік не задавальняе ні адну з каманд. Праўда, на вязкім пасля дажджоў полі сілы футбалістаў паступова пакідалі. Шмат што вырашалі розыгрышы стандартаў. Так і быў забіты, як аказалася пазней, рашаючы мяч. Пасля вуглавога нашы гульцы не ўсачылі за абаронцам дынамаўцаў, і той літаральна ўнёс мяч у вароты. На жаль, усе спробы жодзінцаў выправіць становішча так спробамі і засталіся.

Усе добра ведаюць, што паражэнні бываюць розныя. На гэты раз тарпедаўцы паказалі футбол добрай якасці, толькі б яшчэ навучыцца пазбягаць дзіцячых памылак… А так – апладысменты, якімі праводзілі прайграўшых прыхільнікі аўтазаводцаў, гавораць пра многае.

Цяпер нашы землякі ў наступную нядзелю наведаюцца ў Мазыр, а на сваім полі згуляюць 17 мая ў пятніцу супраць бабруйскай “Белшыны”. Пачатак а 18 гадзіне.

Табліца чэмпіянату пасля 7 тура выглядае наступным чынам.

Сяргей Пузанкевіч