«Сухая» нічыя

“Тарпеда-БелАЗ”: Сцяпанаў, Казлоў, Чараднічэнка, Чалядзінскі, Панкавец, Мендзі (90 хв., Гомза), Селява, Глеб (71 хв., Васькоў), Шчагрыковіч, Сучкоў, Сакрэт (66 хв., Яцкевіч).

Ваяжы аўтазаводцаў у Гомель у апошнія тры гады прыносілі нашым землякам адмоўныя эмоцыі: тарпедаўцы вярталіся з гэтага палескага горада толькі з паражэннямі – 0:1, 0:2, 0:3. Праўда, у міжсезонне калектыў “Гомеля” змяніўся амаль цалкам. Услед за Алегам Кубаравым клуб пакінула і большасць гульцоў асноўнага складу. Замест іх у каман-дзе з’явіліся таксама высокакваліфікаваныя Канцавы, Афа- насьеў, Блізнюк, Камароўскі, Мацвеенка, Жукоўскі і іншыя. Да таго ж гамельчане праводзілі свой першы матч на стадыёне “Цэнтральны”. Жаданне гаспадароў перамагчы было зразумелым, а з жодзінскага боку, пасля буйнога паражэння ад “Шахцёра”, павеяла трывогай.

Ігар Крывушэнка, у параўнанні з папярэдняй гульнёй, правёў дзве замены ў стартавым складзе. І калі выхад Мендзі замест Васькова меў тактычны характар, то дэбют тарпедаўскага галкіпера Рамана Сцяпанава вельмі многіх здзівіў. Варатар “Тарпеда- БелАЗ” адыграў упэўнена і нездарма быў прызнаны лепшым у складзе нашай каманды.

На полі цікавага было няшмат. Каманды пачалі гульню вельмі асцярожна, і калі ад гасцей іншага не чакалі, то ад гаспадароў… Наогул, галявых момантаў было створана мала. У гамяльчан можна ўзгадаць толькі ўдары Камароўскага і Мацвеенка. Што датычыцца аўтазаводцаў, яны былі бліжэй да ўзяцця варот. Так, да перапынку на дальні ўдар рашыўся Мендзі, але мяч праляцеў побач са штангай.

У другім тайме, скарыстаўшыся памылкай абаронцы, сам-насам выскачыў Глеб, толькі вось распарадзіўся шансам не самым лепшым чынам. Не здолеў замкнуць прастрэл з левага фланга Сакрэт, а з ударам Сучкова справіўся варатар “бела-зялёных”. Вынікам сустрэчы стала ў цэлым справядлівая нулявая нічыя, што і прызналі на прэс-канферэнцыі трэнеры каманд.

Сяргей Пузанкевіч