Першы крок зроблены

Вось і завяршыўся першы збор “Тарпеда БелАЗ”, які праходзіў у Лідзе і быў прысвечаны ў асноўным агульнафізічнай падрыхтоўцы. Чаму менавіта гэты горад Гродзенскай вобласці аўтазаводцы выбралі для трэніровак – адказ відавочны. Да паслуг футбалістаў тут створаны цудоўныя ўмовы. Гэта і новы спартыўны комплекс з басейнам, трэнажорным і гульнявым залам, саунай, побач, літаральна ў двух кроках, штучны газон. Тарпедаўцы кожны дзень праводзілі па дзве вельмі інтэнсіўныя трэніроўкі. Спадзяюся, што пасля таго, як у Жодзіне ўступіць у дзеянне штучнае поле, каманда атрымае такія ж камфортныя ўмовы для працы ў родным горадзе.

Трэба адзначыць, што з гэтага сезона з асноўным складам працуе трэнер па навукова-метадычнай падрыхтоўцы Аляксей Юшкевіч, які з выкарыстаннем навейшай апаратуры дапамагае найбольш эфектыўна і індывідуальна дазаваць нагрузкі.

Ранішнія трэніроўкі праходзілі ў памяшканні, а вось вячэрнія, нягледзячы на марознае надвор’е, на свежым паветры. У мінулую сераду аўтазаводцы, падзяліўшыся на дзве каманды, правялі першы трэніровачны матч, які з-за маразоў праходзіў у даволі незвычайным фармаце – тры таймы па дваццаць хвілін. Трэнерскі штаб застаўся задаволены дзеяннямі гульцоў.

А ў завершэнні збора тарпедаўцы згулялі і першы сезонны спарынг. Пасля таго як ад матча па аб’ектыўных абставінах адмовіліся гаспадары – ФК “Ліда”, у сапернікі “напрасіўся” навічок першай лігі ФК “Слонім”. Ігар Крыушэнка ў кожным тайме выкарыстоўваў розных футбалістаў. На жаль, з-за пашкоджанняў і траўм не прымалі ўдзел у матчы Аляксандр Яцкевіч, Раман Сцяпанаў і Дзмітрый Ігнаценка. З першых хвілін на поле ў нашай камандзе ў асноўным выйшлі тыя, хто знаходзіўся на праглядзе. Двойчы блізка да поспеху быў Дзмітрый Лебедзеў, але ў апошні момант абаронцы паспявалі ліквідаваць пагрозу, а калі яшчэ адзін патэнцыяльны навабранец – нападаючы Дзмітрый Гомза – адправіў мяч у сетку, суддзя зафіксаваў становішча па-за гульнёй.

Пасля перапынку “Тарпеда-БелАЗ” гуляла ў наступным складзе: Пяцігорац, Казлоў, Каршакевіч, Чэлядзінскі, Яраслаўскі, Селява, Лявіцкі, Шчэгрыковіч, Васькоў, Сучкоў, Каралюк. Нашы землякі валодалі значнай перавагай, і асноўныя падзеі разгортваліся на палове поля “Слоніма”, але асаблівасці марознага газона крыху нівеліравалі розніцу ў класе. Першы і пакул адзіны гол стартаваўшага міжсезоння правёў Артур Лявіцкі з перадачы Юрыя Каралюка. На гэтай мажорнай ноце жо-дзінцы і завяршылі лідскі збор.

А ўжо ў пятніцу каманда возьме курс на Турцыю, дзе і працягне падрыхтоўку да новага сезона.

Сяргей Пузанкевіч

При использовании материалов с сайта ссылка на источник www.zhodinonews.by обязательна!