Тарпедаўцы захавалі прапіску

29 лістапада, г.п. Гарадзея, ст-н “Гарадзея”, 800 гледачоў, суддзя – Дз. Шчэрбакоў (рФ, Мінск), “Гарадзея” – “Тарпеда-БелАЗ” – 1:0. Гол: 6 хв., Лебедзеў – 1:0.

“Тарпеда-БелАЗ”: Чэсноўскі, Чэлядзінскі, Яраслаўскі, Ланько (59 хв., Васькоў), Шчэгрыковіч, Салавей, Казлоў, Рабцаў, Хлебасолаў (59 хв., Вяргейчык), Селява, Лашанкоў (46 хв., Мендзі).

2 снежня, Жодзіна, ст-н “Тарпеда”, 2300 гледачоў, суддзя – В.Панчанка (н/к, Магілёў), “Тарпеда-БелАЗ” – “Гарадзея” – 4:0. Галы: 31 хв., Вяргейчык – 1:0; 54 хв., Мендзі – 2:0; 64 хв., Васькоў – 3:0; 75 хв., Яцкевіч – 4:0.

“Тарпеда-БелАЗ”: Чэсноўскі, Чэлядзінскі, Яраслаўскі, Яцкевіч (86 хв., Лашанкоў), Вяргейчык (66 хв., Селява), Шчэгрыковіч, Рыжко, Салавей, Казлоў, Мендзі (80 хв., Ланько), Васькоў.

Заняўшы апошняе (адзінаццатае) месца ў чэмпіянаце, тарпедаўцы былі вымушаны для захавання прапіскі ў вышэйшай лізе двойчы згуляць з “Гарадзеяй”, якая стала другой у першай лізе. Гэтыя пераходныя матчы павінны былі стаць кропкай ісціны для жодзінцаў. Першая сустрэча адбывалася ў Гарадзеі. Гаспадары, а аснову іх каманды складаюць ква-ліфікаваныя футбалісты, маючыя багаты вопыт выступленняў на самым высокім узроўні, пачалі гульню без азірання на статус саперніка. І трэба такому здарыцца, ледзь не першы ўдар па варотах Чэсноўскага стаў галявым. Лебедзеў рашыўся на далёкі стрэл, і мяч па мудрагелістай траекторыі трапіў у дзявятку нашай “рамкі”. Аўтазаводцы вялікімі сіламі пайшлі наперад, але колькасць створаных імі небяспечных момантаў была невялікай. А ўлічваючы нашы пастаянныя праблемы з атакай, на душы стала зусім неспакойна. Гарадзейцам такія дзеянні жодзінцаў былі, безумоўна, да спадобы і яны здолелі давесці матч да хоць мінімальнай, але перамогі.

Далейшы лёс “Тарпеда-БелАЗ” быў у руках саміх футбалістаў і трэнерскага штаба. Нашым гульцам у другім матчы неабходна было забіць як мінімум двойчы, пры гэтым захаваць свае вароты ў недатыкальнасці.

Ігар Крыушэнка ў стартавым складзе выставіў адразу двух нападаючых – Вяргейчыка і Яцкевіча. Ужо першыя хвіліны паказалі, што з настроем у тарпедаўцаў праблем няма, а вось з рэалізаціяй галявых момантаў захаваліся. Госці абараняліся вялікімі сіламі, да таго ж, нягледзячы на канчатковы лік, цудоўна дзейнічаў іх галкіпер. Але і ён не здолеў дапамагчы “Гарадзеі”, калі пасля навеса Яраслаўскага галавой прабіў Вяргейчык. Гэта яшчэ больш дадала нашым дынамічнасці і хуткасці, толькі да перапынку лік не змяніўся.

Другая палова пачалася з двух цудоўных момантаў у выкананні гасцей. Дзякуй Богу, Чэсноўскі і недакладнасць удара здолелі захаваць сухасць нашых варот. А потым быў крыху кур’ёзны, але вельмі прыгожы стрэл Мендзі. Гарадзейцы пасля гэтага пайшлі наперад, а аўтазаводцы атрымалі цудоўныя шансы для контратак і двойчы імі скарысталіся. Спачатку Васькоў пасля дакладнай перадачы Салаўя давёў лік да буйнога, а потым Яцкевіч з блізкай адлегласці загнаў мяч пад перакладзіну. Нарэшце, жодзінскія балельшчыкі ўбачылі такую вялікую колькасць забітых мячэй у выкананні сваёй каманды. Ну а буйная перамога дазволіла не толькі захаваць прапіску ў вышэйшай лізе, але і паставіць мажорную кропку ў цэлым правальным сезоне.

Сяргей Пузанкевіч