Засуха ў спякоту

9 жніўня, Жодзіна, стадыён “Тарпеда”, 630 гледачоў, суддзя – А.Кульбакоў (Гомель), “Тарпеда-БЕЛАЗ” – “Слуцк” – 0:0.

“Тарпеда- БЕЛАЗ”: Часноўскі, Чэлядзінскі, Сяр-дзюк, Бурко, Панкавец, Дземідовіч, Селява, Хачатуран, Скавыш(78 хв. Васькоў), Рабянок (62 хв. Кібук), Глеб( 63 хв. Платонаў).

Вось і завяршыўся амаль месячны перапынак у чэмпіянаце Беларусі і, здавалася, заўзятары футбола павінны былі засумаваць па гульні, але агледзеўшы трыбуны стадыёна “Тарпеда” пад час матча са “Слуцкам”, нявольна ўзнікала пытанне: “Ці любяць футбол у нашым горадзе?”. Крыху больш паўтысячы гледачоў сабралiся каб паназіраць за гульнёй аўтазаводцаў. Зразумела, летняя спякота і дачныя справы не маглі адмоўна не адбіцца на колькасці, але, на мой уласны погляд, галоўная прычына памяншэння наведвальнікаў бачыцца ў гульні аўтазаводцаў. Нестабільнасць выступлення нашых землякоў у гэтым сезоне працягваецца. І матч са “Слуцкам” стаў яскравым доказам наяўнасці гэтай праблемы.

Пасля галявога кубкавага салюта ў сустрэчы з “Оршай”, здавлася, ёсць усе падставы чакаць працягу – на жаль, не атрымалася. Случчанам, якія знаходзяцца ўнізе турнірнай табліцы, тэрмінова патрэбна выпраўляць сітуацыю і менавіта па гэтай прычыне ў іх складзе з’явіліся тры афрыканскія легіянеры з Кот-д’Івуара. І трэба адзначыць, яны аднасэнсоўна ўзмацнілі гасцей. Адзін з іх (Куаджа) “цэменціраваў” цэнтр абароны і не аднойчы менавіта яго дакладныя дзеянні не дазвалялі аўтазаводцам вырвацца на аператыўны прастор. Дарэчы, колькасць галявых момантаў, створаных дзвюма камандамі, была мінімальнай. Бо у першую чаргу сапернікі клапаціліся аб шчыльнасці ўласнай абароны. У дзеяннях аткуючай лініі нашых землякоў не хапала сыграннасці. І гэта не дзіўна, бо Скавыш, Дземідовіч і Рабянок праводзяць толькі другі матч за тарпедаўцаў. А тут яшчэ не пайшла гульня ў Глеба, ад якога звычайна сапернікі і чакаюць самай вялікай непрыемнасці. Вось і атрымалася, што да перапынку па-сапраўднаму галявы момант ля варот “Слуцка” быў створаны толькі адзін. Пасля прастрэла з левага фланга Хачатуран ударыў злёту ў адзін дотык, але цудоўна згуляў галкіпер гасцей Лесько. Быў яшчэ адзін эпізод, які выклікаў шквал эмоцый на трыбунах. Парнёры вывялі Дземідовіча сам на сам з галкіперам і наш нападаючы ў выніку сутыкнення аказаўся на футбольным газоне. Пенальці – паказалася большасці прыхільнікаў аўтазаводцаў, але арбітр паказаў, што трэба працягваць гульню. Неаднаразовы прагляд гэтага моманта на відэа не здолеў прывесці да адзінага вываду.

Другі тайм стаў лагічным працягам першай паловы. І зноў сапернікі гулялі вельмі прагматычна, чакаючы пры гэтым чужых памылак. А іх, як можна здагадацца, было няшмат. Случчане, цудоўна разумеючы, што нічыя ў гасцях – негоршы вынік, усе ж спрабавалі вярнуцца ў родны горад з перамогай. Некалькі разоў толькі бліскучая рэакцыя Часноўскага выра-тоўвала тарпедаўцаў, а аднойчы, калі і наш галкіпер ужо аказаўся толькі гледачом, мяч з пустых варот выбіў капітан Аляксей Панкавец. Было горача і ля супрацьлеглых варот, праўда, нячаста і зноў з нулявой выніковасцю. Ігар Крыўшэнка спрабаваў змяніць сітуацыю заменамі, але і выйшаўшыя гульцы не здолелі “размачыць” Лесько. Найбольш рэальны момант быў у Кібука, але мяч, ляцеўшы ў рамку, выбілі абаронцы гасцей. Такім чынам, нулявую нічыю, зафіксаваную галоўным арбітрам, трэба прызнаць справядлівым вынікам, што, дарэчы, і падцвердзілі галоўныя трэнеры пад час пасляматчавай прэс-канферэнцыі. Ну, а заўзятарам тарпедаўцаў застаецца спадзявацца на тое, што з часам навабранцы знойдуць поўнае паразуменне з партнёрамі, і вернецца тая мінулагодняя гульня, якая прыносіла шмат станоўчых эмоцый.

А вось дублёры парадавалі. Яны дабіліся буйной перамогі над сапернікамі са Слуцка – 7:1. Хе-трык на рахунку Анатоля Макарава, двойчы вызначыўся Кнацько-Штрэк і яшчэ па аднаму мячу правялі Белко і Цурко.

Наступны паедынак “Тарпеда-БЕЛАЗ” правядзе ў Мозыры супраць мясцовай “Славіі”, а на сваім полі аўтазаводцы 23 жніўня будуць прымаць сталічнае “Дынама”. Пачатак гульні ў 20 гадзін.

Сяргей Пузанкевіч