Грошы на будаўніцтва салігорскага храма раскрадаліся?

Цягам двух месяцаў не сьціхаюць чуткі вакол крымінальнай справы, нібыта заведзенай на настаяцеля Хрыстараждзественскага сабору протаіерэя Мікалая Розва (на фота). Сайт САЛІГОРСК.org паспрабаваў высьветліць дзе тут праўда, а дзе мана.

Паведамленьні аб затрыманьні ў якасьці падазраванага па крымінальнай справе галоўнага гарадзкога праваслаўнага сьвятара паступалі ў рэдакцыю яшчэ два месяцы назад. Па інфармацыі з розных крыніц, тады айцец Розаў быў вызвалены адразу пасьля допыту. У апошні час гісторыя зноў усплыла і пачала актыўна абмяркоўвацца. У горадзе загаварылі, што адзін з найбольш паважаных жыхароў Салігорску зьмешчаны ў сьледчы ізалятар, а абвінавачваецца ён у прысабечваньні грошаў, якія салігорцы ахвяроўвалі на будаўніцтва буйнейшага храму ў рэгіёне.

Пікантнасьць сытуацыі палягае ў тым, што на працягу ўжо некалькіх год раённыя ўлады праз адміністратыўны рэсурс прымушаюць салігорцаў штомесяц адлічваць з сваіх заробкаў пэўны адсотак грошаў на будаўнітва гэтага самага сабору. Ня гледзячы на пратэсты гараджан, спыніць заганную практыку абавязковых пабораў на хацелкі мясцовых уладаў так і не атрымалася. Спачатку гэта быў збор сродкаў на лукашэнкаўскі лядовы палац, потым на рэканструкцыю гардзкіх вуліц да юбілею Салігорску, а цяпер храм. Вось толькі першыя дзьве хацелкі ўрэшце былі рэалізаваныя, а з будаўніцтвам Хрыстараждзественскага сабору неяк не заладзілася - будоўлю пампезна пачалі і... ня скончылі.

Па атырманай намі інфармацыі, вельмі сур'ёзная частка грошаў была проста раскрадзена. Сьледзтва знайшло ў сьвятара замежны рахунак, на якім, верагодна, і захоўваліся горошы. Таксама нібыта вялася праверка на датычнасьць да раскраданьня сродкаў самога старшыні Салігорскага райвыканкаму Аляксандра Рымашэўскага і ягонай намесьніцы па эканоміцы Ірыны Зубарэвіч. Інфармацыю аб ня мэтавым выкраыстаньні сродкаў з фонду будаўніцтва храма, наш сайт атрымлівае не ўпершыную. Нават зараз разглядаецца магчымасьць часовага пазычаньня гэтых сродках для выплаты заробкаў на некаторых прадпрыествах раёну. Зрэшты, прадстаўнікі салігорскай ўлады ня ўпершыню ўляпваюцца ў брудны сканадал і ўрэшце апошнім удалося выйсьці сухімі з вады і на гэты раз.

Ва ўсёй гэтай гісторыі заставаўся адзін прагал - арышт і зьмяшчэньне ў сьледчы ізалятар Мікалая Розва. Дадзеная інфармацыя не прайшла мінімальнай праверкі - сьвятара можна і зараз убачыць у храме. Аднак і на гэта ёсьць лягічнае тлумачэнне. Па атырманай намі інфармацыі высьветлілася, што нядаўна Салігорск наведвалі вышэйшыя царкоўныя чыны Беларускай Праваслаўнай Царквы і "замялі" справу. Прадстаўнікі царквы паабяцалі, што Міклай Розаў усё адно будзе пакараны, вось толькі не дзяржаўным судом, а царкоўным. Што гэта будзе, пазбаўленне сану, забарона ў сьвятарскім служэньні ці ссылка ў аддаленую вёску, пакажа час.

Ул.інф.