Арыштаваны Мікалай Розаў?

Салігорскія ўлады ўляпаліся ў новы сканадал. Брудная гісторыя зьвязана з раскраданьнем грошаў на завяршэнне будаўніцтва Хрыстараждзественскага сабору ў сталіцы шахтароў. Па інфармацыі атрыманай сайтам САЛІГОРСК.org, арыштаваны настаецель храму протаіерэй Мікалай Розаў (на фота).

Паведамленьні аб затрыманьні ў якасьці падазраванага па крымінальнай справе галоўнага гарадзкога праваслаўнага сьвятара паступалі ў рэдакцыю яшчэ два месяцы назад. Штопраўда, тады айцец Розаў быў вызвалены адразу пасьля допыту. Цяпер жа, як паведамляе наша крыніца, адзін з найбольш паважаных жыхароў Салігорску зьмешчаны ў сьледчы ізалятар. Абвінавачваецца Мікалай Розаў у раскраданьні грошаў, якія салігорцы ахвяроўвалі на будаўніцтва буйнейшага храму ў рэгіёне.

Пікантнасьць сытуацыі палягае ў тым, што на працягу ўжо некалькіх год раённыя ўлады праз адміністратыўны рэсурс прымушаюць  салігорцаў штомесяц адлічваць з сваіх заробкаў пэўны адсотак грошаў на будаўнітва гэтага самага сабору. Ня гледзячы на пратэсты гараджан, спыніць заганную практыку абавязковых пабораў на хацелкі мясцовых уладаў так і не атрымалася. Спачатку гэта быў збор сродкаў на лукашэнкаўскі лядовы палац, потым на рэканструкцыю гардзкіх вуліц да юбілею Салігорску, а цяпер храм. Вось толькі першыя дзьве хацелкі ўрэшце былі рэалізаваныя, а з будаўніцтвам Хрыстараждзественскага сабору неяк не заладзілася - будоўлю пампезна пачалі і... ня скончылі.

Як высьвятляецца, вельмі сур'ёзная частка грошаў была проста раскрадзена. Па інфармацыі нашай крыніцы, сьледзтва знайшло ў сьвятара замежны рахунак, на якім, верагодна, і захоўваліся горошы. Таксама нібыта вялася праверка на датычнасьць да раскраданьня сродкаў самога старшыні Салігорскага райвыканкаму Аляксандра Рымашэўскага і ягонай намесьніцы па эканоміцы Ірыны Зубарэвіч. Але апошнім удалося выйсьці сухімі з вады. Зрэшты, спраўдзіць гэтую вэрсію можна будзе пад час разгляду справы ў судзе.

На дадзены момант САЛІГОРСК.org спрабуе атрымаць афіцыйную інфармацыю і камэнтар па дадзенай справе.

Ул.інф.