Толькі беларускія

kurjer Новости Слуцка | 06-12-2012

Для аматараў беларускай музыкі Случчыны 30 лістапада прайшло вялікае свята: народны ансамбль песні і музыкі «Случчанскiя святкi» адзначыў свой 15-гадовы юбілей. У Гарадскім доме культуры моладзі адбыўся вялікі святочны канцэрт. Мерапрыемства сабрала поўную залу гледачоў.

«Адна з асноўных місій нашага ансамбля — захаванне беларускіх традыцый і мовы. І калі раней у нас гучалі ўкраінскія і рускія народныя песні, то цяпер у нашым рэпертуары толькі беларускія», — сказаў у гутарцы з карэспандэнтам газеты «ІК» Сяргей Пратасевіч, стваральнік і кіраўнік «Случчанскiх святак». Падчас святочнага канцэрта са сцэны прагучала 24 кампазіцыі.

У адрас калектыву гучалі віншаванні ад райвыканкама і аддзела культуры, а таксама ад кіраўніцтва Слуцкага цукроварафінаднага камбіната, які з'яўляецца галоўным спонсарам ансамбля.

Нагадаем, што «Случчанскiя святкi» — адзін з самых знакамітых ансамбляў Случчыны. Сярод яго ўзнагарод — Гран-пры, залаты медаль і некалькі дыпломаў Еўрапейскага чэмпіянату па фальклору (Euro Folk 2010).

Алесь Дастанка