“Не наша гульня”. “Маладзечна-ДЮСШ-4” саступіла мінскаму “Праменю” з лікам 0:2 (Фота)

Маладзечанская каманда прымала гасцей на дамашнім стадыёне ў суботу, 10 кастрычніка. У выніку гульні апусцілася з другога на трэці радок турнірнай табліцы.

Гульня ішла пры 5 градусах цяпла. На трыбунах было няшмат гледачоў, фанацкі сектар налічваў каля дзесяці заўзятараў, якім удалося стварыць гучную падтрымку.

Калі ў першым тайме ініцыятыва была пераважна на баку маладзечанцаў, то другі стаў паступовых рухам да паражэння.

Першы тайм быў больш багаты на галявыя моманты, за якія гледачы ўзнагароджвалі каманду апладысментамі. Хаця абаронца Дзмітры Касцюк ацэньвае іх хутчэй як “паўмоманты”.

Гледачы мёрзлі.

Пасля траўмы.

Футбаліст не прымае прапанову спісаць слабую дынаміку гульні на надвор’е:

– Калі бегаеш, холаду не адчуваеш. Галоўнае – добра размяцца перад гульнёй. А ўжо ў час самога матча эмоцыі засцілаюць любы холад. Тым больш, што і мы, і сапернік наконт надвор’я ў абсалютна роўных умовах.

Жоўтыя карткі атрымлівалі як маладзечанская каманда, так і сапернік. Касцюк каментуе пытанне парушэнняў так: да суддзі прэтэнзій няма, толькі да сябе.

Другі тайм маладзечанцы гулялі яшчэ слабей і ў выніку прапусцілі першы гол на 53-й хвіліне, а закончылі з лікам 0:2. Гульню саперніка не назавеш агрэсіўнай, але напружанне накальвалася ўвесь матч. Ствараць галявыя моманты напрыканцы сезона заўсёды складаная задача: ідзе барацьба за месцы ў фінале, кожнае ачко мае вагу. Такая барацьба будзе толькі ўзмацняцца з кожным матчам да канца сезона.

Першы тайм.

Дзмітры Касцюк падсумоўвае, што маладзечанцы лёгкай гульні і не чакалі, але матч атрымаўся зусім не нашай гульнёй.

На гэта ёсць суб’ектыўныя прычыны: многія футбалісты асноўнага саставу не змаглі ўдзельнічаць у матчы. Хаця стараліся ўсе, вылучыць зорку гульні не выпадае. Безумоўна, каманда стомленая: у кожнага ёсць асноўнае месца працы, штодзённыя трэніроўкі, гульні другой лігі, а таксама абласныя спаборніцтвы. Нагрузка на каманду вялікая, і футбалісты выдатна разумеюць, што ў апошніх гульнях камандзе чагосьці не хапае, гульцы ствараюць вельмі мала галявых момантаў.

Заўзятар маладзечанскай каманды Дзмітры Рухлевіч на сваёй старонцы ў сацыяльных сетках каментуе матч так: “За тры туры фінальных гульняў мы набралі ўсяго 2 ачка і забілі толькі 1 мяч. Што адбылося з камандай? Папярэднія гульні камандаў групы А даказалі, што з клубамі другой групы можна гуляць у свой футбол і набіраць ачкі, але... штосьці ідзе не так менавіта ў нас. Мы так лёгка згубілі перавагу перад сапернікамі, якую так цяжка заваёўвалі, і апынуліся на мяжы вылету з прызавой тройкі. Застаецца спадзявацца, што ў каманды прачнецца гонар і спартыўная злосць, каб не спусціць ва ўнітаз усё добрае, што заслугоўвалі цягам сезона”.

Галоўны трэнер маладзечанскай каманды Аляксандр Гармаза адмовіўся каментаваць пройгрыш.

Матч трэба разбіраць, каб зразумець памылкі і атрымаць шанец падняцца вышэй ў турнірнай табліцы. Ці хаця б не згубіць цяперашнія пазіцыі.

Наступная гульня адбудзецца 17 кастрычніка на выездзе супраць клецкай каманды.