НЯХАЙ ТУРНІРЫ ГЭТЫЯ СЯГАЮЦЬ ПРАЗ СТАГОДДЗІ…

Ужо каторы год я ўдзельнічаю ва інтэлектуальных гульнях. Мне падабаецца думаць над цяжкімі пытаннямі або пытаннямі з падвохам, даведвацца пра штосьці новенькае, цікавае і незвычайнае, насычаць сваю духоўную патрэбу ведамі…

У мяне ёсць свая каманда «Свет пазітыву», у якой гуляюць мае сяброўкі: Аліна Дашкевіч, Насця Корань, Аня Рымашэўская, Ульяна Воранава, Крысціна Процкая. Дапамагае нам у гэтым годзе і Слава Тарлоўскі з каманды «Абы не краў», якая, на жаль, распалася. Яны ўсе таксама, як і я, любяць «ламаць» мозг…

Але якія ж гульні без арганізатараў і трэнераў?! Яны ў нас ёсць, а дакладней — яна. Гэта добра вядомая на Чэрвеньшыне і за яе межамі Ірына Іванаўна Вабішчэвіч. Яна робіць вялікую працу, можна сказаць, займае сапраўднай і карыснай справай ці не палову падлеткаў Чэрвеня. Менавіта Ірына Іванаўна арганізоўвае ўсе турніры, за што ёй вялікі дзякуй!

Кожную пятніцу ўвечары яна праводзіць трэніроўкі. Мы гуляем у «Брэйн-рынг»,  «Што?Дзе? Калі?», «Эрудыт-квартэт» ды іншыя гульні. А летась у нас з’явілася нават цэлая брэйн-сістэма, дзякуючы якой мы і гуляем у «Брэйн-рынг». Вельмі цікава на гэтых трэніроўках «штурмаваць» уласны мозг, які з кожным разам пачынае думаць хутчэй і лагічней.

Самае цікавае — гэта, вядома, самі гульні. Зараз мы супрацоўнічаем з рознымі гарадамі і краінамі. Увесну 2013 года дэлегацыя з 15 чалавек ездзіла на гульню ажно ў расійскі горад-пабрацім Юбілейны!

Пакеты з пытаннямі нам дасылаюць розныя людзі. Самыя вялікія турніры — гэта «Ігуменская завея», а таксама мемарыяльная гульня, прысвечаная памяці інтэлектуала Юрыя Мірановіча. Апошняя прайшла зусім нядаўна. На ёй, як заўсёды,  прысутнічалі дарослыя, студэнты, якія некалі прымалі ўдзел у інтэлектуальных гульнях, і школьнікі. Мы ўсе — адна сям’я, мы ўсе – разам!

Мне хочацца, каб турніры цягнуліся праз стагоддзі, каб у далейшым нашы дзеці, унукі і праўнукі таксама развіваліся і цікавіліся інтэлектуальнымі гульнямі.

Юлія АДАМОВІЧ,

вучаніца 10 класа гімназіі №1

імя У.Караля г.Чэрвеня