Мы Калядачкі да гуляць будзем у Новаянчына

Не знікаюць традыцыі святкавання Каляд у Новаянчынскім Доме фальклору. Мясцовыя традыцыі святкавання Каляд прайшлі праз стагоддзі і захавалася тут да нашых дзён. Завітала ў Дом фальклора на калядныя святкаванні 12 студзеня здымачная група тэлеканала «Беларусь 1».

Жанчыны фальклорнага гурта «Суседкі», як і ў цёмныя зімовыя вечары нашы продкі, сабраліся, каб адзначыць Каляды. Традыцыйна Каляды звязваліся з днём першага зімовага сонцастаяння і сімвалізавалі пачатак новага году — як сонечнага, так і сельскагаспадарчага. Калядныя святкаванні ў Новаянчына працягваюцца да Вадохрышча.

Ведаюць у Новаянчына розныя спосабы каляднай варажбы. Абавязковым дзеяннем было варажыць на будучы ўраджай. На святочны стол жанчыны пад абрус падкладалі сена, і выцянуўшы доўгую саломіну, адзначылі, што год будзе добрым, а жыта высокім. Ведаюць жанчыны фальклорнага гурта «Суседкі» як і на суджанага варажыць. Марыя Іванаўна Салаўёва знайшла суджанага, абдымаючы плот. Апусціўшы лучынку ў стакан з вадой і паставіўшы яго пад ложак, Таццяна Васільеўна Данілава ўбачыла свайго будуча мужа ў сне, Раса Паўлаўна Анікеева-з дапамогай каляднай кашы.

Прадэманстравалі «Суседкі» як рыхтавалі стравы на другую — багатую куццю. Гэта каляднае святкаванне раней супадала з сустрэчай Новага года, таму ў кожнай хаце iмкнулiся падкрэсліць дабрабыт сям’i на ўвесь будучы год. У адпаведнасцi з iснуючым павер’ем: як сустрэнеш новы год, такiм ён i будзе.

Галоўнай стравай у вёсцы Новаянчына на Шчадрэц былі і застаюцца бліны-скавароднікі, рэцэпт прыгатавання якіх быў прадманстраваны. Таксама на стол падавалi каўбасы, сала, рознае печыва.

Па старадаўніх павер’ях у перыяд ад Каляд да Вадохрышча нельга было працаваць, таму праводзілі свой вольны час жыхары ў танцах і спевах. Асабліва любяць тут танчыць «Нарэчаньку». Напрыканцы народнага абраду нясменны гарманіст фальклорнага гурта Анікееў Валянцін Барысавіч пажадаў усім моцнага здароўя і дабрабыту.