Абласны семінар-практыкум па харавому мастацтву ў Барысаўскім раёне

У адпаведнасці з планам работы ДУ “Мінскі абласны цэнтр народнай творчасці” 5 снежня на базе Стара-Барысаўскага сельскага дома культуры і Стара-Барысаўскай школы мастацтваў Барысаўскага раёна адбыўся абласны семінар-практыкум для кіраўнікоў вакальна-харавых калектываў па тэме: “Асноўныя этапы развіцця харавой выканальніцкай тэхнікі ў розных узроставых катэгорыях і складах хору”. Да ўдзелу ў семінары былі запрошаны кіраўнікі ўстаноў адукацыі, культуры і кіраўнікі вакальных калектываў. 23 спецыяліста з вобласці, а таксама настаўнікі адукацыйных школ горада Барысава і Барысаўскага раёна прысутнічалі на мерапрыемстве.

Адкрыла мерапрыемства спецыяліст аддзела аматарскай творчасці, галоўны хормайстар ДУ МАЦНТ В.У. Нупрэйчык. У праграме семінара вопытам работы з харавымі калектывамі дзялілася Аксана Уладзіміраўна Паўлава, загадчык харавога аддзялення ДУА “Старабарысаўская дзіцячая школа мастацтваў”, кіраўнік дзіцячага хора “Allegria”, народнага вакальнага ансамбля “Зарождение» Стара-Барысаўскай дзіцячай школы мастацтваў і харавой капэлы “Светач” Стара-Барысаўскага сельскага дома культуры.

У праграме семінара практыкума з малодшай і старэйшай групай хора «Allegria» былі прадэманстраваны навыкі развіцця асноў харавой тэхнікі і вакальных навыкаў ў розных творах. Асаблівасці работы ў малым колькасным складзе, рытм-групы, гукаперайманне, джазавы акорд - з ансамблем настаўнікаў школы мастацтваў «Зарождение». Харавое выкананне ў змешанай узроставай катэгорыі было прадэманстравана на прыкладзе работы з харавой капэлай “Светач”. Калектыў наведваюць і вучні школы, і аматары харавых спеваў з усяго раёна (Лошніца, Вяляцічы, Стара-Барысаў).

Дзеянне семінара адбывалася ў розных умовах для харавога ўспрымання гуку: харавы клас, фае, актавы зал. Напрыканцы для ўсіх прысутных з удзелам харавых калектываў і Заслужанага аматарскага калектыву Рэспублікі Беларусь ансамбля народных інструментаў “Каралі” Стара-Барысаўскага СДК адбыўся невялічкі канцэрт, які завяршыўся агульнай песняй «Парижское танго». Традыцыйна вынікі семінару і абмен меркаваннямі былі падведзены за круглым сталом.

За дасканалую арганізацыю і правядзенне абласнога мерапрыемства, які з’явіўся сапраўднай школай майстэрства для кіраўнікоў вакальна-харавых калектываў вобласці, МАЦНТ направіў Падзячны ліст начальніку аддзела ідэалагічнай работы культуры і па справах моладзі Н.В.Кузняцовай, а таксама выказаў шчырую падзяку дырэктару ДУК РЦНТ Г.М.Марцінчык, дырэктару ДУА “Старабарысаўская дзіцячая школа мастацтваў” А.М.Лабавіковай, дырэктару Старабарысаўскага сельскага Дома культуры А.М.Шашкову і асабіста вядучай творчай частцы вучобы кадраў А.У.Паўлавай.