Юбілеі ў бібліятэцы

Значныя юбілеі адзначыла сельская бібліятэка-музей народнай творчасці і побыту вёскі Леванова. Сёлета споўнілася 65 год сельскай бібліятэцы № 29 в. Леванова. 10-годдзе адзначылі клуб «Субацея» и музей народнай творчасці і побыту, якія дзейнічаюць пры бібліятэцы.

На ўрачыстае мерапрыемства, прысвечанае гэтым знакавым датам, завіталі прадстаўнікі мясцовай і раённай ўлады, калегі-бібліятэкары, ураджэнцы і жыхары вёскі, СМІ.

Удзельніцы клуба падрыхтавалі канцэрт — этнагарафічную замалёўку аб гісторыі бібліятэкі, клуба і музея. Усе яны — таленавітыя і энергічныя жанчыны сталага ўзросту, якія спяваюць народныя песні і прыпеўкі, танчаць, вышываюць ручнікі і накідкі, пякуць найсмачнейшы хлеб.

Дзякуючы існаванню клуба «Субацея» аднаўляецца і захоўваецца культурная спадчына Мядоцкага краю — фальклорная, этнаграфічная, мастацкая.

Са словамі падзякі і віншавання да прысутных звярнуліся намеснік начальніка аддзела ідэалогіі, культуры і па справах моладзі Алла Георгіеўна Ленкіна, дырэктар Барысаўскай цэнтральнай раённнай бібліятэкі імя І.Х. Каладзеева Алена Сяргееўна Капыток, старшыня Мётчанскага сельскага выканаўчага камітэту Валерый Рыгоравіч Лучына.

На свята ў сельскую бібліятэку завітала зямлячка Лілія Станіславаўна Ананіч — старшыня Саюза выдаўцоў і распаўсюджвальнікаў друку і намеснік старшыні грамадскага аб'яднання «Беларускі саюз жанчын». Клуб «Субацея» і яе кіраўнік — бібліятэкар Марыя Мікалаеўна Несцяровіч — атрымалі ганаровыя граматы ад грамадскай арганізацыі «Беларускі саюз жанчын» «За актыўны ўдзел у прапагандзе народнай творчасці, захаванне і развіццё духоўнай спадчыны, развіццё жаночага руху, фарміраванне ў падрастаючага пакалення любові да Малой Радзімы». Бібліятэка-музей народнай творчасці і побыту в. Леванова пад час свята атрымала Дыплом Саюза выдаўцоў і распаўсюджвальнікаў друку «За прапаганду народных традыцый, кнігі, чытання ў Год малой радзімы».

Цёплыя словы пажаданняў ў адрас клуба «Субацея» і яе кіраўніка гучалі і ад жыхароў вёскі, усе ўдзельніцы клуба атрымалі падарункі і кветкі ад гасцей.