Святы Вялікдзень

З 10 па 16 красавіка ў рамках раённага Тыдня традыцыйнага мастацтва “Вялікдзень на Барысаўшчыне” у Цэнтры традыцыйнай культуры прайшла выстаўка работ майстроў і кіраўнікоў гурткоў “Святы Вялікдзень”. На выстаўцы былі прадстаўлены работы ў розных тэхніках і напрамках дэкаратыўна-прыкладнага мастацтва: кераміка, саломапляценне, вышыўка, шэрсцяная “акварэль”, інкрустацыя саломкай, выцінанка, лозапляценне і шыццё. Наведвальнікі выставы дзівіліся простасцю і прыгажосцю папяровых і саламяных анёльчыкаў, фетравых і баваўняных птушачак і яек. Наўзамен натуральным фарбаваным яйкам, майстры і кіраўнікі гурткоў Цэнтра традыцыйнай культуры прапанавалі вырабы ў выглядзе яек з фетру, гліны, драўляныя з інкрустацыяй саломкай ці абернутыя шпагатам і аздобленыя карункамі, выразаныя з паперы і, нават, яйкі з лазы, якія майстра аздобіў натуральнымі крупамі. Таксама на выставе можна было пабачыць пасхальных зайцоў, курачак, птушак і інш.

Тыдзень перад Вялікаднем заўсёды быў поўным клопатаў і хваляванняў. Шмат працы было асабліва ў жанчын. Яны рыхтавалі ежу і прыбіраліся ў хаце. Мылі ўсё: падлогу, сцены, сталы, лавы, бялілі печ. Фарбавалі яйкі.

У чацвер усе мыліся ў лазні, у ваду абавязкова клалі сярэбраную манету, каб быць увесь год чыстымі і здаровымі.

У пятніцу пяклі чорны хлеб, у суботу ўсю прыгатаваную ежу складвалі ў плецены кошык, каб асвяціць яго ў царкве (касцёле).

Вечарам дарослыя і моладзь апраналіся ў святочную вопратку, ішлі на богаслужэнне, дома заставаліся толькі старыя і дзеці.

Пасля заканчэння службы, якая праходзіла ўсю ноч, кожны гаспадар імкнуўся як мага хутчэй патрапіць дадому, абагнаць суседа, бо згодна з народным павер'ем, гэта павінна было дапамагчы раней за ўсіх скончыць палявыя работы, вырасціць лепшы ўраджай.

За святочным сталом спачатку елі па кавалачку варанага яйка, а потым усё астатняе. У першы дзень Вялікадня нельга было пазычаць нікому з суседзяў ці сваякоў. Любімай забавай было біццё і пампаванне яек.

На наступны дзень ездзілі і хадзілі ў госці адзін да аднаго.