Ці змагла б слонімская Крошка стаць лепшай каровай краіны?

У Беларусі 6 чэрвеня пройдзе конкурс «Лепшая карова» з уручэннем прызоў яго удзельніцам. Ці змагла б нейкая слонімская рагуля перамагчы ў конкурсе і атрымаць узнагароду, карэспандэнт «ГС» пацікавілася ў слонімскіх жывёлаводаў.

Нягледзячы на тое, што капытных канкурсантак будуць ацэньваць па многіх параметрах, галоўным пытаннем, вядома, было: ці многа карова дае малака?

—Магчыма, наша Крошка магла б паўдзельнічаць — дае па 42-43 л за суткі. А за год на ферме атрымліваем сярэдні ўдой ад каровы 7 221 кг,  — сказаў па тэлефоне Віктар Сёмуха, загадчык фермы ў Збочна СВК “Драпава”, які па вытворчасці малака быў летась у перадавіках.   

Крошкай сваю падапечную з гумарам назвала Людміла Наумовіч за яе вялікія габарыты. Са слоў перадавой даяркі, больш малочнай за Крошку ў гаспадарцы раней была карова Страла, якая цяпер ідзе на запуск.

Магчымая канкурсантка ад фермы ў Міжэвічах СВК “Міжэвічы” крыху адстае — самая малочная рагуля там дае за суткі 37,5 л малака. Як сказала загадчыца фермы Галіна Бондарава, ферма ў іх новая і яны толькі выходзяць на патрэбны ўзровень, набіраюць дойны статак.

Ад каровы-ўдарніцы на Ягнешчыцкай ферме СВК “Сянькоўшчына” атрымліваюць 42,5 л за суткі. Па словах памочніка загадчыка гэтай фермы Таццяны Дробчык, колькасць удою адсочвае навейшая камп’ютарная сістэма “Вестфалія”, якая счытвае інфармацыю з чыпаў на нагах жывёл.

Якімі дасягненнямі ўразяць беларускія каровы і ці змаглі б ім саставіць канкурэнцыю слонімскія, пакажуць вынікі конкурсу. Агулам жа мясцовыя рагулі ў абласным рэйтынгу па надоях займаюць сярэднія пазіцыі. Згодна з інфармацыяй Белстата, адна сярэднестатыстычная карова ў Слонімскі раёне за студзень-красавік дала 1 649 кг малака. Гэта 9-е месца сярод 17 раёнаў Гродзенскай вобласці.