Важкае слова грамадскасці

Па ўсім было відаць, перад такой аўдыторыяй вясковец адчуваў сябе вельмі няёмка: нервова перабіраў у руках шапку, апускаў вочы долу... А калі загаварылі, які ён адказны і старанны работнік, калі не п’е, мужчына ажно праслязіўся.

– Калі згодны, дапаможам Вам закадзіравацца, – прапанаваў яму Іван Мар’янавіч Карніла – член савета грамадскага пункта аховы парадку, спецыяліст СВК “Астрына”.

Вясковец згодна заківаў галавой. Калі ён пайшоў, дзверы ў кабінет старшыні Астрынскага пассавета зноў адчыніліся. Сямейная пара – жыхары пасёлка – на пасяджэнне савета была запрошана па просьбе кіраўніцтва школы, дзе вучацца іх дзеці. Настаўнікі, якія наведвалі іх, пабачылі ў доме непарадак. Устрывожыла і тое, што ў гэтай мнагадзетнай сям’і працуе толькі гаспадыня, а моцная палавіна перабіваецца часовымі заробкамі. Ды і тое нямногае, што трапляе ў яго кашалёк, “вывуджвае” на гарэлку...

Аднак перад аўтарытэтнай грамадскасцю прызнаваць сваю віну мужчына не спяшаўся. Маўляў, нічога страшнага ў такім ладзе жыцця сям’і ён не бачыць... І са сваімі праблемамі справіцца сам.

“Вам трэба закадзіравацца”, – настойліва пераконвалі мужчыну члены савета ГПАП. Важкае слова сказаў і ўчастковы інспектар міліцыі С.Г. Матукевіч.

– Па плане пасяджэнні савета грамадскага пункта аховы парадку павінны праходзіць раз у квартал, – тлумачыць спецыяліст Астрынскага пасвыканкама і сакратар савета гэтага грамадскага фарміравання Алена Іванаўна Цагельнік. – Але пры неабходнасці збіраемся часцей – прыкладна раз у месяц. Атрымліваем інфармацыю і прадстаўленні з праваахоўных органаў, якія патрабуюць разгляду. Паступаюць да нас і сігналы ад зацікаўленых ведамстваў аб недастойных паводзінах жыхароў пассавета ў сям’і і быце. Вось і на чарговае пасяджэнне выклікалі каля 40 парушальнікаў грамадскага парадку. Палавіна з іх на гутарку прыйшлі, з іншымі давядзецца сустрэцца іншым разам. Сярод тых, каго заслухалі на пасяджэнні савета ГПАП, былі сямейныя скандалісты, парушальнікі правіл дарожнага руху і пажарнай бяспекі, аматары прагуляцца п’янымі ў грамадскіх месцах, самагоншчыкі, бацькі-п’яніцы, “бязрукія” гаспадары захламленых сядзіб і падворкаў. Асобныя з іх на савеце не першы раз.

На пасяджэнні савета ўшчуваннямі ды заклікамі жыць прыстойна, не парушаць закон, не абмяжоўваюцца. Як патлумачыла А.І. Цагельнік, такія адносіны ў яго членаў толькі да тых, хто ў стане змяніць свае паводзіны ці выпадкова парушыў устаноўленыя заканадаўча правілы і нормы жыццядзейнасці. Для катэгорыі грамадзян, якія перагледзець у сваім жыцці і паводзінах нічога не хочуць, ёсць іншыя меры ўздзеяння – адміністрацыйная адказнасць.

Паміж іншым, да прыняцця кожнага свайго рашэння члены савета ГПАП падыходзяць вельмі ўзважана. Мо таму, што ўсе яны – людзі кампетэнтныя, з багажом жыццёвага вопыту. Гэта старшыня Астрынскага пасвыканкама М.М. Каранкевіч (ён жа – старшыня савета ГПАП. – заўв. аўтара), ужо ўзгаданыя А.І. Цагельнік і І.М. Карніла, а таксама дырэктар цэнтра пазашкольнай работы М.Э. Хоміч, загадчыца мясцовай дзіцячай бібліятэкі Г.А. Сцяпанчанка, дырэктар Астрынскай СШ Ю.А. Пыш, намеснік дырэктара ПМС па ідэалагічнай рабоце М.С. Саковіч і іншыя.

Як падкрэсліла А.І. Цагельнік, збіраючыся разам на чарговае пасяджэнне, усе гэтыя людзі спадзяюцца, што абагульненае слова грамадскасці ўсё ж будзе пачутым тымі людзьмі, да каго яно звернута.
Таццяна ПАЛУБЯТКА.
Фота аўтара.