Прадстаўніцтва Белдзяржстраху па Шчучынскім раёне памяняла адрас

Будынак былой канторы быткамбіната, што побач з рэдакцыяй, мяняўся на вачах. Спачатку ад яго засталіся толькі сцены і дах – бо новы гаспадар хацеў бачыць зусім іншае архітэктурнае рашэнне. І вось, нарэшце, аб’ект здаецца пад ключ. Гэтага моманту прадстаўніцтва Белдзяржстраху па Шчучынскім раёне чакала доўга.

Урачыстасць шчучынскіх “страхавікоў” раздзялілі госць са сталіцы – генеральны дырэктар Белдзяржстраху, прадстаўнікі раённай улады, будаўнікі МПМК-166, якія рэканструявалі аб’ект. Дарэчы, у аднаўленне будынка было ўкладзена больш за 1,5 млрд. рублёў, якія выдзеліў Белдзяржстрах.

Як падкрэсліў у віншавальнай прамове генеральны дырэктар Белдзяржстраху Анатоль Іосіфавіч Сверж, прывабнасць гораду надаюць не толькі новыя, але і рэканструяваныя будынкі. І гэта той самы выпадак. А супрацоўнікі Белдзяржстраху будуць камфортна адчуваць сябе ў новых кабінетах, ветліва сустракаць наведвальнікаў і прапаноўваць ім свае паслугі.

– Работнікам прадстаўніцтва можна па-добраму пазайздросціць, – зазначыў намеснік старшыні райвыканкама Міхаіл Іванавіч Міхно, – ісці на работу ў прыгожы офіс у цэнтры горада вельмі прыемна. Зручна будзе і наведвальнікам.

Міхаіл Іванавіч выказаў упэўненасць, што абавязкова павялічыцца колькасць кліентаў, якія будуць карыстацца паслугамі Белдзяржстраху, бо побач яскравы прыклад таго, што не трэба спадзявацца на “а можа”. Маецца на ўвазе нядаўні пажар на міні-рынку “Захад”, у выніку якога прадпрымальнікі панеслі вялікія страты, якія ім ніхто не кампенсуе, бо страхавымі паслугамі яны не скарысталіся.

Міхаіл Іванавіч падзякаваў будаўнікам за работу, а Белдзяржстраху – за фінансаванне аб’екта.

І вось урачысты момант – начальнік МПМК-166 У.У. Пісаркоў уручае сімвалічны ключ дырэктару прадстаўніцтва Белдзяржстраху па Шчучынскім раёне М.Ф. Бекішу, які шчыра дзякуе будаўнікам за прыгожы будынак. А перарэзаць чырвоную стужачку даверылі А.І. Свержу і У.У. Пісаркову.

Удзельнікам урачыстасці ўручылі сувеніры і запрасілі ў новы будынак. Прасторныя вестыбюлі, утульныя кабінеты з сучаснай офіснай мэбляй, канешне, радуюць вока. Дарэчы, работнікі паспелі аздобіць інтэр’ер кветкамі і рознымі сімпатычнымі дробязямі, што вельмі ажывіла кабінеты. І ўсё гэта для вас, паважаныя жыхары Шчучына і раёна. Каб не трывожыцца за сваю маёмасць, здароўе, нядаўна зроблены рамонт, пры часе наведайцеся ў будынак па вуліцы Леніна, 63 і аформіце страхавы дагавор на ваш выбар.
Ала УЛАДЗІМІРАВА.
Фота Сяргея ГАРДЗЕЙЧЫКА.