32 ідэі “Сяльчанкі”

Голосов пока нет

Біяграфія ў пярвічкі невялікая – дзейнічае яна менш за два гады. Аднак пра яе справы вядома ўжо далёка за межамі аграгарадка Васілішкі – месца яе “прапіскі”.

– На рахунку “Сяльчанкі” шмат добрыў спраў, – зазначае старшыня пярвічкі Ядвіга Чаславаўна Шырокая. – У нас згуртаваліся настолькі актыўныя і ініцыятыўныя жанчыны, што ідэі проста віруюць, і многія з іх мы ўжо ажыццявілі. Напрыклад, арганізавалі курсы, каб вяскоўкі асвойвалі камп’ютар і вывучалі англійскую мову. У пярвічцы дзейнічаюць клубы па інтарэсах: хтосьці вышывае, хтосьці асвойвае кветкавы дызайн і г.д. Сельскія жанчыны хочуць зрабіць сваё жыццё цікавым, разнастайным і прыкладваюць для гэтага шмат намаганняў.

Нядаўна Я.Ч. Шырокая з задавальненнем дзялілася са сваімі каляжанкамі ўражаннямі ад паездкі ў сталіцу на семінар-трэнінг “На шляху да ўтварэння ўплывовай арганізацыі”. Разам з ёй у семінары ўдзельнічалі яшчэ дзве шчучынскія актывісткі – старшыня раённага савета жанчын С.У. Шанчук і яе намеснік М.Я. Ціцяк, дырэктар цэнтра карэкцыйна-развіваючага навучання і рэабілітацыі. Цікава было прадстаўніцам Шчучынчыны сустрэцца і абмяняцца вопытам работы са старшынямі пярвічак “Сяльчанкі” з розных куткоў Беларусі, даведаліся яны таксама, як і чым жывуць сельскія жанчыны еўрапейскіх краін. Госця з Нідэрландаў Анке Вервард – дырэктар асацыяцыі сельскіх жанчын – расказала пра дзейнасць арганізацыі з 80-гадовай гісторыяй, якая аб’яднала 46 тысяч сельскіх жанчын. Удзел у семінары прыняў і вядомы еўрапейскі эканаміст Юп Вандэр Фліп. Ён расказаў, як дапамагае ствараць бізнэс-праекты сельскім жанчынам, якія хочуць арганізаваць сваю справу.
Удзельнікі семінара дзяліліся поспехамі і напрацоўкамі сваіх пярвічак, стваралі праекты будучага – планавалі работу арганізацый да 2017 года. Дарэчы, пэўную цікавасць выклікаў і праект васілішкаўскай пярвічкі.

На шляху да стварэння ўплывовай арганізацыі яшчэ шмат чаго прадстаіць зрабіць – з такой устаноўкай развітваліся ўдзельнікі семінара. Дзейнічаць трэба неадкладна – пастанавілі мясцовыя актывісткі “Сяльчанкі” і вырашылі правесці ў Васілішках семінар па кветкаводстве. Акрамя членаў пярвічкі на семінар, які пройдзе 29-30 верасня ў Васілішках, запрашаюцца жанчыны, для якіх развядзенне кветак стала любімым захапленнем. Вас чакае сюрпрыз: вопытам развядзення дэкаратыўных раслін і ў прыватнасці цыбульных кветак падзеляцца замежныя госці – супружная пара з Нідэрландаў. Так што, паважаныя жанчыны, “Сяльчанка” чакае вас у Васілішкаўскім цэнтры культуры і вольнага часу. Не пакіньце дома і цікавую ідэю.

Ала УЛАДЗІМІРАВА