Творчая вечарына Антона Янкоўскага

Запрашаем на творчую вечарыну маладога паэта і пісьменніка Антона Янкоўскага, якая адбудзецца 25 кастрычніка ў 17.00 у Новым замку ў зале паседжанняў Гродзенскай абласной навуковай бібліятэкі імя Я.Карскага. На вечарыне адбудзецца прэзентацыя другога зборніка вершаў маладога аўтара пад назвай “Белыя рамонкі”. Сардэчна запрашаем!

“Буду рады бачыць на сваёй вечарыне знаёмых, сяброў і ўсіх, каму цікава беларуская паэзія. Любоў да Матулі, каханне, павага да Радзімы – асноўныя тэмы ў маёй творчасці. І мне б хацелася падзяліцца з вамі сваімі вершаванымі думкамі,” – запрашае аўтар.

З творчасцю Антона Янкоўскага бліжэй можна пазнаёміцца на сайце “Родныя вобразы”. А таксама пачытаць на ЖЖ. 

Антон Янкоўскі нарадзіўся 29 сакавіка 1986 года ў вёсцы Енчы Воранаўскага раёна Гродзенскай вобласці ў сям’і настаўнікаў. У пяцігадовым узросце сям’я пераехала ў вёску Нача гэтага ж раёна, якую ён лічыць сваёй Радзімай, бо свядомая жыццё пачалося менавіта тут. У 2003 годзе ён скончыў Нацкую сярэднюю школу. У 2008 г. – Беларускі дзяржаўны універсітэт культуры і мастацтваў па спецыяльнасці “Рэжысура народных абрадаў і свят”. Зараз працуе выкладчыкам тэатральных дысцыплін у Гродзенскім дзяржаўным каледжы мастацтваў.

Невялікія дзіцячыя апавяданні і замалёўкі пачаў пісаць у пачатковых класах, у юнацкія гады былі напісаны першыя вершы на рускай мове. У студэнцкія гады прыйшло разуменне, што толькі беларуская мова можа быць мовай яго паэзіі. Піша вершы, прозу, публіцыстыку.

Друкаваўся ў газетах “Літаратура і мастацтва”,“Гродзенская праўда” і “Воранаўская газета”, у зборніках універсітэта культуры і мастацтва “Дар зямны” і “Альфабэт”, у рэспубліканскіх часопісах “Рэпетытар”, “Дзеяслоў” і “Маладосць”. Аўтар зборнікаў вершаў “Анёл з васільковымі вачыма” (2010г) і “Белыя рамонкі” (2012г). Узнагароджанны дыпломам 1-ай ступені ў абласнога літаратурнага конкурсу “Бацькаўшчына светлая мая”, прысвечанага 80-годдзю з дня нараджэння Уладзіміра Караткевіча.