На областном этапе олимпиады добрушане показали высокий клас!

Скончыўся трэці абласны этап рэспубліканскай алімпіяды. Пяцьдзясят адзін вучань 8-11 класаў у гэтым годзе абаранялі гонар нашага раёна па 13 вучэбных прадметах. Пераможцам стаў амаль кожны трэці прадстаўнік раённай каманды. Гэта пятнаццаць навучэнцаў агульнаадукацыйных устаноў. Лепшыя вынікі паказалі вучні гімназіі г. Добруша, яны заваявалі 10 дыпломаў рознай ступені па такіх вучэбных прадметах як грамадазнаўства, біялогія, хімія, беларуская і руская мовы, гісторыя, працоўнае навучанне.

-Такіх вяршынь нашы дзеці даўно не дасягалі, – падзялілася думкамі інспектар аддзела адукацыі райвыканкама А.Журбянкова. – Трэба адзначыць, што стала больш на 11 дыпломаў у параўнанні з 2010 годам, але колькасць ўдзельнікаў і вучэбных дысцыплін не змянілася. Гэта сведчыць аб высокай ступені прафесіяналізму настаўнікаў, таленце, мэтанакіраванасці і працавітасці дзяцей, а яшчэ падтрымцы бацькоў, без якой не магчыма ні адна перамога. Па выніках трэцяга этапу рэспубліканскай алімпіяды чатыры пераможцы з нашага раёна ўвайшлі ў склад абласной каманды для ўдзелу ў фінале. Зараз яны праходзяць першы двухтыднёвы вучэбны збор, потым будзе другі, а з чатырнаццатага сакавіка пачнецца чацвёрты, заключны, этап алімпіяды па вучэбных прадметах.

Сапраўды, у мінулым годзе толькі чатыры вучні набралі патрэбныя балы для атрымання дыпломаў і толькі адзін удзельнічаў у фінале, а ў гэтым годзе ўжо чатыры будуць удзельнічаць у заключным этапе алімпіяды. Амаль пра кожнага з гэтых таленавітых дзяцей мы пісалі на старонках нашай газеты. Нагадаем іх імёны: Кірыл Кажамякін, вучань 8 класа САШ №2 г. Добруша атрымаў дыплом ІІ ступені па матэматыцы; Таццяна Грыцава, вучаніца 9 класа САШ №3 г. Добруша атрымала дыплом І ступені па працоўным навучанні; Кацярына Гутарава, вучаніца гімназіі

г. Добруша – абсалютная пераможца, дыплом І ступені па беларускай мове і літаратуры; Антон Панфілаў, вучань 11 класа гімназіі г. Добруша – дыплом І ступені па грамадазнаўстве. Пажадаем ім поспехаў у дасягненні вялікай перамогі на шырокіх шляхах ведаў.