Міхаіл Сяркоў: "Планую з 2014 года частку нарад праводзіць на беларускай мове".

Старшыня Пружанскага райвыканкаму Міхаіл Сяркоў заявіў чытачам газеты "Раённыя Будні", што плануе з 2014 года частку нарад праводзіць на беларускай мове.

Застаецца толькі спадзявацца, што ў раёне, дзе роднай мовай лічыць беларускую 65,44% і размаўляюць на ёй дома 39,6% насельніцтва, а моладзь стварыла нават суполку беларускамоўнай моладзі Пружан гэтыя планы рэалізуюцца ў жыцці.

Заява старшынёй райвыканкаму была зроблена падчас адказу на пытанне:

—Міхаіл Мікалаевіч, адкажыце, калі ласка, чаму Пружаны — горад, дзе немагчыма сваё дзіця аддаць а ні ў беларускамоўную групу ў яслі-сад, а ні ў беларускамоўны клас гарадской школы? Чаму для навучання свайго дзіцяці на роднай (адной з дзяржаўных моваў) мы вымушаныя з’язджаць у вёску, альбо ў Брэст ці Мінск?

—Паважаны Алесь, калі будуць жадаючыя вучні і бацькі, я буду дзвюма і трыма рукамі галасаваць «за», каб такія класы з’явіліся. Мне падабаецца беларуская мова, і я планую з 2014 гады частку нарад праводзіць на беларускай мове.