В Ганцевичском районе на научно-экспериментальной базе «Журавинка» началась уборка клюквы

На навукова-эксперыментальнай базе “Журавінка” Цэнтральнага батанічнага сада Нацыянальнай акадэміі навук Беларусі прыступілі да ўборкі журавін. Ягады — гэта толькі пабочны прадукт дзейнасці базы. На ёй найперш вядзецца даследчая работа і развядзенне прыстасаваных для клімату Беларусі гатункаў ягадных культур. Тым не менш, сабраныя журавіны даюць магчымасць не толькі ацаніць ураджайнасць розных гатункаў, але і зарабіць на іх. На сённяшні дзень гэтыя ягады “Журавінка” пастаўляе на экспарт па аптовай цане 2 долары за кілаграм.

Часта даводзіцца чуць, што лясныя ягады больш карысныя. Вось і вырашылі звярнуцца да загадчыка “Журавінкі”, кандыдата біялагічных навук Мікалая Баляслававіча Паўлоўскага з пытаннем, ці так гэта?

— Журавіны балотныя, на якія багаты наш край, і журавіны буйнаплодныя, развядзеннем якім мы займаемся на базе, два розныя віды. Варта адзначыць, што журавіны буйнаплодныя выведзены спецыяльна для прамысловай вытворчасці. І па спажыўных якасцях кожны від мае свае перавагі: балотныя ягады багатыя вітамінам С, таму яны і кіслейшыя, а буйнаплодныя ўтрымліваюць больш пекцінаў і антацыянаў — рэчываў, якія маюць амаладжальны эфект. Так што нельга гаварыць, што адзін від лепшы за другі. Хаця яшчэ пры Савецкім Саюзе ў рацыён касманаўтаў уключаліся менавіта журавіны буйнаплодныя, вырашчаныя на нашай навукова-эксперыментальнай базе. Дарэчы, гэтыя ягады з-за сваіх якасцей таксама значна больш прыдатныя для выкарыстання ў харчовай прамысловасці, чым журавіны балотныя.

На сённяшні дзень на “Журавінцы” маецца звыш 40 гатункаў буйнаплодных журавін, з якіх найбольш прыстасаваныя для нашых кліматычных умоў і глебы вырошчваюцца ў прамысловых маштабах. Чаранкі гэтай ягаднай культуры актыўна купляюць для развядзення не толькі спецыялізаваныя прадпрыемствы па ўсёй Беларусі, але і з-за мяжы. Летась, напрыклад, некалькі вялікіх партый чаранкоў журавін для стварэння ўласных плантацый набылі фірмы з Латвіі і Расіі.

Усё гэта вынік карпатлівай працы як навукоўцаў, так і аграномаў з рабочымі базы, што шчыруюць у адной звязцы. Вось і гэтымі днямі аграном Надзея Наумік, якая сумесна са сваім калегам Віталіем Мікалаевічам Бруем займаецца размнажэннем ягадных культур і доглядам за імі, шчыруе разам з рабочымі “Журавінкі” на пераборцы ягад. Пасля механізаванага збору яны патрабуюць яшчэ дадатковай ачысткі ад лісця. За плячыма Надзеі Ільінічны звыш 10 гадоў працы на “Журавінцы”, і ўвесь тэхналагічны працэс вырошчвання ягадных культур яна ведае дасканала.

Работа навукоўцаў і абслугоўваючага персаналу базы прыносіць свой плён: на працягу года плантацыі даюць пасадачны матэрыял для развядзення журавін і радуюць чарговым важкім ураджаем ягад.

І гэта датычыцца не толькі журавін. Вельмі вялікай папулярнасцю ў пакупнікоў карыстаюцца і буякі, што тлумачыцца іх каштоўнасцю. Толькі сёлета ўжо рэалізавана звыш 20 тысяч саджанцаў гэтых ягад па цане 20 тысяч рублёў за двухгадовую расліну. Буякі ў прамысловым маштабе не патрабуюць такіх фінансавых затрат, як журавіны. А пры захоўванні тэхналогіі вырошчвання праз два гады саджанцы гэтай культуры пачынаюць плоданасіць і ўжо дарослы куст дае каля 4 кілаграмаў буякоў. А зараз, у залежнасці ад пары года, цана на гэтую ягаду вагаецца ад 4 да 12 долараў за кілаграм.

Павел СВІСТУНОВІЧ.

Фота аўтара.